ԵՐԵՎԱՆ, 3 մարտի, Sputnik. «Երազի տուն» վերականգնողական և զարգացման կենտրոնը վերակառուցվել է Երևանի քաղաքապետարանի, «Հայ մայրեր» ՀԿ-ի, մի շարք կազմակերպությունների և անհատների ջանքերով: Այս մասին տեղեկացնում է Երևանի քաղաքապետարանի մամուլի ծառայությունը։
«Հայ մայրեր» ՀԿ հիմնադիր նախագահ Նարինե Մանուկյանը նշել է, որ «Երազի տան» վերակառուցման և տեղափոխման աշխատանքները մեկնարկել են 2016 թվականի սկզբին և ավարտին են հասցվել 2017 թվականի փետրվարին: Նոր կենտրոնը կկարողանա սպասարկել «Հայ մայրեր» ՀԿ ավելի քան 260 շահառուներին:
Հարկ է նշել, որ այսուհետ օգնություն կցուցաբերվի ոչ միայն երեխաներին, այլև նրանց ծնողներին, ովքեր կկարողանան ստանալ հոգեբանի խորհրդատվություն և մասնակցել տարբեր սեմինարների և դասընթացների, ինչն, ի դեպ, 2017 թվականին կներառվի նաև Երևանի քաղաքապետարանի աջակցությամբ իրականացվող «Երևանի քաղաքապետարանը՝ Երևանի մանուկներին» ամենամյա ծրագրում:
