ԵՐԵՎԱՆ, 3 մարտի — Sputnik. WWF-Հայաստանը 2002 թվականից երկրում կենդանիների հիմնական տեսակների` կովկասյան ընձառյուծի, հայկական մուֆլոնի և բեզոարյան այծի վերաբերյալ ուսումնասիրություններ է անցկացնում, Sputnik Արմենիային տված հարցազրույցում ասաց Հայաստանում կովկասյան ընձառյուծի պահպանման WWF ծրագրի համակարգող Արսեն Գասպարյանը։
Նրա խոսքով` Հայաստանում այս կենդանիների ճանաչելի դարձնելու դինամիկան և միտումները դրական են։
«Մեր կազմակերպությունը ոչ միայն բնապահպանական գործունեությամբ է զբաղվում, այլև կանոնավոր կերպով մոնիտորինգ է իրականացնում։ Դրանք ցույց են տալիս, որ կենդանատեսակների աճ է արձանագրվել, հատկապես կովկասյան ընձառյուծի», — ասաց Գասպարյանն` ընդգծելով, որ կոնկրետ ծրագրերի իրականացման արդյունքում վերջին 15 տարիների ընթացքում Զանգեզուրի լեռնաշղթայում բնակվող կովկասյան ընձառյուծի քանակը հասել է 10-ի։
«Երիտասարդական» մետրոյի կայարանում այսօրվանից մեկ ամիս կգործի «Հայոց լեռների արքա կովկասյան ընձառյուծ» ցուցահանդեսը։
Գասպարյանի խոսքով` ցուցահանդեսի շրջանակներում ներկայացվել են ընձառյուծների պատկերներով լուսանկար-ցուցանակներ և նրանց մասին տեղեկություն`կենդանիների բնակեցման կոնկրետ գոտիները, որ կենդանիների նկատմամբ են որս իրականացնում և ինչպես, ինչպես են իրականացվում կենդանատեսակի պահպանմանն ուղղված ծրագրերը։
««Երիտասարդական» կայարանը պատահաբար չի ընտրվել` այն ամենամարդաշատն է։ Մեկ ամսվա ընթացքում այս կայարանով անցնում են հազարավոր ուղևորներ, իսկ դա մեզ հիանալի հնարավորություն է ընձեռում նրանց կովկասյան ընձառյուծի մասին պատմելու», — ասաց նա։
Այս տարի ակցիան անցկացվում է «Լսի՛ր երիտասարդների ձայնը» կարգախոսով։ Ցուցահանդեսի նպատակն է երիտասարդների ուշադրությունը սևեռել վայրի բնության պահպանման հարցին։
Գասպարյանը նաև ավելացրեց, որ կովկասյան ընձառյուծի պահպանումը նպաստում է նաև որս հանդիսացող կենդանատեսակների` բեզոարյան այծի, հայկական մուֆլոնի և քարայծի պահպանմանը։
ՄԱԿ-ի Գլխավոր ասամբլեան 2013 թվականի դեկտեմբերի 20-ից մարտի 3-ը Վայրի բնության պահպանման համաշխարհային օր է (World Wildlife Day) հռչակել` նպատակ ունենալով բարձրացնել հասարակության իրազեկությունը վայրի բնության և կենդանական աշխարհի նկատմամբ։ ՄԱԿ-ի պատմության մեջ սա կարևոր իրադարձություն է։
