ԵՐԵՎԱՆ, 3 մարտի — Sputnik. Մայրաքաղաքի վարչական շրջաններում շարունակվող ձնամաքրմանը զուգահեռ` ընթանում են բազմաբնակարան և հասարակական շենք-շինությունների տանիքներից կախված սառցալեզվակների հեռացման և տանիքների ձյան մաքրման աշխատանքները: Այս մասին հայտնում է Երևանի քաղաքապետարանի մամուլի ծառայությունը։
Հաշվի առնելով այն հանգամանքը, որ առկա է նաև շենքերի տանիքներից ձնաթափման վտանգը, հանձնարարվել է հնարավորին արագ և օպերատիվ շարունակել ձյան և սառույցի մաքրման գործընթացը, որն իրականացվում է ՀՀ ԱԻ նախարարության տեխնիկական միջոցների գործադրմամբ, հրշեջ փրկարարների աջակցությամբ ու համատիրությունների աշխատակիցների ներգրավմամբ:
«Սառցալեզվակները կհեռացվեն այնքան ժամանակ, մինչև վերանա դրանց ընկնելու վտանգը»,– նշված է հաղորդագրության մեջ:
Բոլոր դեպքերում, Երևանի քաղաքապետարանը քաղաքացիներին հորդորում է ցուցաբերել զգուշություն և այս օրերին հնարավորին խուսափել անցուդարձից` շենքերի ու շինությունների անմիջական հարևանությամբ:
