ԵՐԵՎԱՆ, 2 մարտի — Sputnik. Ջրհեղեղը մոտ 3 հազար կիլոմետր երկարությամբ և մի քանի տասնյակ կիլոմետր լայնությամբ ջրանցք է թողել Մարսի վրա: Այս մասին հայտնում է Եվրոպական տիեզերական գործակալությունը։
Գիտնականները հայտնագործությունն արել են «Մարս էքսպրես» զոնդի միջոցով արված Վուսթեր խառնարանի լուսանկարների ուսումնասիրման ժամանակ: Այդ խառնարանը Քրիստոսի հարթավայրի մոտակայքում է։ Գիտնականների համոզմամբ` դա օվկիանոսի հատակն է, որը գոյություն է ունեցել մոտ 4 միլիարդ տարի առաջ:
Մոլորակագետները ենթադրում էին, որ հարթավայրը շրջապատող բազմաթիվ ջրանցքներն ու կիրճերը կարող են լինել մարսիական գետերի հուները: Բայց ուսումնասիրելով Mars Odyssey զոնդի միջոցով արված լուսանկարները` նրանք փոխել են իրենց տեսակետը` ենթադրելով, որ դա կարող են ցունամիի հետքեր լինել: Այս մասին վկայում է վերևից կղզու տեսք ունեցող Վուսթեր խառնարանի ձևը, որի սահմանները ձևավորվել են ջրի հոսքով: Ընդ որում, այդ ջուրը հոսել է բլրով վեր, ինչը երևում է խառնարանի եզրերից:
Նշվում է, որ խառնարանի ձևավորմանը նպաստել են սառույցի հսկայական պաշարները, որոնք գտնվել են Քրիստոսի հարթավայրի մակերևույթի տակ և Մարսի այլ մասերում: Գիտնականների խոսքով` սառույցը հալել է մոտ 3,5 միլիոն տարի առաջ հրաբուխների ժայթքման արդյունքում:
