Սևանա լիճը սառցակալել է նույնիսկ այն տարիներին, երբ լճի մակարդակը 20 մետրով, իսկ ջրի ծավալը 20 մլրդ խմ-ով շատ էր, քան այսօր:
90-ականներին, երբ լճի մակարդակն ամենացածր նիշին էր հասել, Սևանը սառցակալում էր առավել հաճախակի՝ գրեթե յուրաքանչյուր երկրորդ ձմռանը:
Այս մասին Sputnik Արմենիայի հետ զրույցում ասաց ԵՊՀ աշխարհագրության և երկրաբանության ֆակուլտետի ֆիզիկական աշխարհագրության և ջրաօդերևութաբանության ամբիոնի վարիչ Թրահել Վարդանյանը:
«Սևանա լիճը գրեթե ամեն երկրորդ տարին լիճը եթե ոչ ամբողջությամբ, ապա գոնե ափամերձ հատվածներով սառցակալում էր»,- ասաց գիտնականը՝ հավելելով, որ որքան լճի մակարդակը ցածր է, այնքան ավելի հաճախ է սառցակալում:
ԱԻՆ-ի պաշտոնական վիճակագրության համաձայն` 1980-1993թթ-ին Սևանա լիճը սառցե շերտով է պատվել գրեթե ամեն ձմեռ: 2000-2012 թվականների ընթացքում լիճը սառցապատվել է միայն 4 անգամ:
