ԵՐԵՎԱՆ, 2 մարտի — Sputnik. Օրենքի ցանկացած խախտում՝ անկախ դրդապատճառներից և նրանից, թե ով է դա թույլ տվել, պետք է պատժվի, խորհրդարանի կուլիսներում լրագրողներին ասաց Հայաստանի Ազգային ժողովի փոխխոսնակ Էդուարդ Շարմազանովը` մեկնաբանելով Արարատի մարզում ՀՀԿ-ի և «Ծառուկյան» դաշինքի ներկայացուցիչների միջև դանակահարության փաստը։
Ոստիկանության մամուլի ծառայությունը հաղորդել էր, որ մարտի 1-ին Արարատի մարզի Սայաթ Նովա գյուղում վիճաբանություն է տեղի ունեցել երկու բնակչի միջև, որի արդյունքում մեկը մյուսին դանակահարել է։
«Ժողովուրդ» թերթի տվյալներով` տուժած Աբրահամ Ադամյանը «Ծառուկյան» դաշինքի կողմնակից է, իսկ դանակահարած Արթուր Հայրապետյանը` ՀՀԿ-ի պատգամավորի թեկնածու Մուրադ Մուրադյանի։
Դա Մուրադյանի հետ կապված առաջին դեպքը չէ։ Ավելի վաղ ԶԼՄ-ները հաղորդել են այն մասին, որ նրա համախոհները Մասիս քաղաքում ծեծել են մեկ այլ թեկնածուի շտաբի ղեկավարի։
«Եթե հանցագործություն է կատարվել, խախտվել է օրենքը, մեղավորները, անկախ քաղաքական դրդապատճառներից կամ կուսակցական պատկանելությունից, պետք է պատժվեն։ Բոլոր նրանք, ովքեր կփորձեն քաղաքական պայքարը վերածել բռունցքներով մարտի, ապա կպատժվեն օրենքի ամբողջ խստությամբ»,- ասաց Շարմազանովը։
Նրա խոսքով` դա վերաբերում է նաև ապատեղեկատվություն տարածողներին։ Ըստ Շարմազանովի՝ քաղաքային իշխանություններն իրենց հերթին ամեն ինչ կանեն, որպեսզի ընտրությունների նախաշեմին պայքարն ընթանա օրենքի շրջանակում։ Իրավապահ մարմինները հետաքննում են խախտումների բոլոր դեպքերը`կապված գալիք ընտրությունների հետ։
Իր հերթին, «Բարգավաճ Հայաստան» խմբակցության առաջնորդ Նաիրա Զոհրաբյանը հայտարարեց, որ Արարատի մարզում կատարված միջադեպը կրում է վառ արտահայտված քաղաքական բնույթ։
«Նոր ռեյտինգային համակարգը սպառնում է քաղաքական պայքարը վերածել գլադիատորական մարտի կամ ցլամարտի»,- ասաց նա։
Զոհրաբյանը կոչ արեց քաղաքական ուժերին, մասնավորապես, «ամենազոր» թեկնածուներին՝ զերծ մնալ նման քայլերից, քանի որ նրանք դրանով ստվեր են նետում կուսակցությունների վրա, ինչպես նաև հակասում են ազատ ու ժողովրդավարական ընտրությունների մասին բոլոր հայտարարություններին։ Նա նաև հաղորդեց, որ տուժածը ստացել է դանակի չորս հարված, վիրահատվել է և, բարեբախտաբար, գտնվում է կայուն վիճակում։
