ԵՐԵՎԱՆ, 2 մարտի — Sputnik. Վիգեն Սարգսյանի նախաձեռնած «Զինծառայողների ապահովագրության» հիմնադրամի կայքում հրապարակվել է «1000 դրամի» նախագծով հավաքագրված գումարի չափը։ Մարտի 2-ի դրությամբ հավաքագրվել է 398 միլիոն 345 հազար 929 դրամ։
Հիմնադրամի խորհրդի անդրանիկ նիստում նշվեց, որ 2017 թվականի համար ավելի քան 1 միլիարդ դրամի ծախս է նախատեսվում:
«Աստված տա` այս ծախսերը չկատարենք, բայց եթե անհրաժեշտություն լինի, 1 միլիարդ 731 միլիոն դրամ ծախս ենք առաջարկում կատարել։ Դա փոխհատուցումն է, որը կազմված է ակտուալ հաշվարկների հիման վրա՝ 100 զոհ և 50 վիրավորի հաշվարկով, որ այս տարվա համար որպես գումար պլանավորում ենք»,- նիստի ընթացքում ասաց հիմնադրամի տնօրեն Վարուժան Ավետիքյանը:
«Զինծառայողների ապահովագրության» հիմնադրամի հոգաբարձուների խորհրդի նիստում հիմնադրամի խորհրդի նախագահ ընտրվեց ՀՀ պաշտպանության նախարար Վիգեն Սարգսյանը:
Զինծառայողների ապահովագրության հիմնադրամը ստեղծվել է զոհված և վիրավորված հերոսների ու նրանց ընտանիքների ֆինանսական կայունությունն ու սոցիալական բարօրությունն ապահովելու նպատակով:
