ԵՐԵՎԱՆ, 2 մարտի — Sputnik. «Կասպերսկի լաբորատորիան» ներկայացրել է հայ երեխաների ինտերնետային այցելությունների վիճակագրությունը:
«Հայ երեխաների շուրջ 87 տոկոսն օգտագործում է ինտերնետային հաղորդակցությունների միջոցներ: Երեխաները հիմնականում սոցիալական ցանցեր են այցելում», — ասաց Նովիկովը՝ նշելով, որ նման վիճակագրությունը համապատասխանում է համաշխարհային ցուցանիշներին:
Նրա խոսքով՝ երեխաները (շուրջ 22 տոկոս) այցելում են նաև այնպիսի կայքեր, որտեղ անպարկեշտ բառեր պարունակող նյութեր կան, ալկոհոլի, ծխախոտի, թմրանյութերի մասին կայքեր (շուրջ 20 տոկոս), համակարգչային խաղերի կայքերի այցելություններն էլ կազմում են 17 տոկոս:
Մնացած 16 տոկոսը՝ աուդիո, վիդեո, ծրագրային ապահովում, 15 տոկոսը՝ էլեկտրոնային առևտուր, 6 տոկոսը՝ էրոտիկա և պոռնոգրաֆիա, 5 տոկոսը՝ այլ կայքեր (զենք, բռնություն, աշխատանք և այլն):
Նովիկովի խոսքով՝ ծնողների մեծամասնությունը չի պատկերացնում, թե ինչով են իրենց երեխաները զբաղվում համացանցում:
