ԵՐԵՎԱՆ, 2 մարտի — Sputnik. Անդրադառնալով 29 տարի առաջ տեղի ունեցած վայրագություններին` դեմոկրատ հայամետ կոնգրեսականը հիշեցրել է, որ մեծ մասամբ հայերով բնակեցված ադրբեջանական Սումգայիթ քաղաքում ջարդերը տեղի են ունեցել 1988թ.-ի փետրվարի 27-29-ը։ Այս մասին գրում է Asbarez-ը։
Շիֆը նշել է, որ ադրբեջանցի ՕՄՕՆ-ցիները դռնեդուռ ընկած բռնել են հայերին ու բարբարոսներին հատուկ ձևով տանջամահ արել:
Նա մանրամասն ներկայացրել է ադրբեջանցիների վայրագությունները։ «Սումգայիթում հարյուրավոր հայեր են դաժանաբար սպանվել, կանայք ու աղջիկներ՝ բռնաբարվել: Զոհերն անպատմելի կտտանքների են ենթարկվել ու ողջ-ողջ այրվել: Բարբարոսությունից փրկվածները հուսալքված փախել են իրենց տներից՝ թողնելով ամեն ինչ»:
Կոնգրեսականն ընդգծել է, որ այս ջարդերն ադրբեջանական իշխանությունների կողմից տարիներ շարունակ իրականացվող հակահայկական քարոզչության արդյունքն էին: Նա հիշեցրել է, որ հետագայում նույն այդ իշխանությունները ոչինչ չարեցին պատասխանատուներին պատժելու համար: «Փոխարենը նրանք ջանք չխնայեցին տեղի ունեցածը քողարկելու և իշխանությունների անմիջական դերակատարումը կոծկելու համար: Այս համատեքստում զարմանալի չէ, որ Սումգայիթում տեղի ունեցած բռնությունը ոչ թե ավարտվեց, այլ շարունակվեց Բաքվում»,-ասել է Շիֆը՝ հիշեցնելով, որ նախքան այդ ջարդերն Ադրբեջանում ապրում էր մոտ 450.000 հայ:
Գալով մեր օրեր՝ Ադամ Շիֆը նկատել է, որ այսօր էլ Ադրբեջանը շարունակում է վտանգավոր վարք դրսևորել, սակայն արդեն Արցախի հետ շփման գծում՝ անմիջական սպառնալիք ներկայացնելով տարածաշրջանի կայունությանն ու անվտանգությանը:
Հայտարարության վերջում կոնգրեսականը հիշեցրել է, որ ապրիլին լրանում է Ադրբեջանի ամենամոտ դաշնակցի՝ Թուրքիայի կողմից իրականացված Հայոց ցեղասպանության 102-րդ տարելիցը և ընդգծել, որ մարդկության դեմ իրագործված նման հանցանքները պետք է ճանաչվեն ու գնահատական ստանան և կապ չունի, թե դրանք երբ են տեղի ունեցել՝ 29, թե 100 տարի առաջ:
