ԵՐԵՎԱՆ, 1 մարտի — Sputnik. Երևանն ու Թբիլիսին պայմանավորվել են միասնական շուկայով հանդես գալ, հայտնեց ՀՀ վարչապետ Կարեն Կարապետյանը ԱԺ-ում հարցուպատասխանի ժամանակ։
«Մենք այնպիսի մոտեցում ցուցաբերեցինք, որի համաձայն միասնական շուկայով հանդես կգանք արտաքին աշխարհի առջև։ Մենք վրացական բիզնեսին առաջարկեցինք հայկական հարթակն օգտագործել Իրան (մասնավորապես, ազատ տնտեսական գոտով) և ԵՄ դուրս գալու համար»,- ասաց Կարապետյանը։
Նրա խոսքով` Երևանը չի թաքցնում զբոսաշրջության զարգացման հարցում վրացական փորձի նկատմամբ իր հետաքրքրությունը, իսկ Թբիլիսին չի թաքցնում իր շահագրգռվածությունը հայկական ՏՏ ոլորտի նկատմամբ։
Քննարկվեց նաև երիտասարդության միջև բարեկամական հարաբերությունների կարգավորման հարցը։ «Ինչ վերաբերում է Ջավախքին, մեր հայրենակիցներին և նրանց կրթության հարցերին, մոտ ապագայում ՀՀ կրթության նախարարը կայցելի Վրաստան՝ ձեռք բերված պայմանավորվածությունները ձևակերպելու համար»,- ասաց վարչապետը։
Նրա խոսքով` որևէ անհաղթահարելի խոչընդոտ չկա վրացական կողմի հետ քննարկված հարցերի լուծման համար։
Հայկական պատվիրակության ներկայացուցիչները վարչապետ Կարեն Կարապետյանի գլխավորությամբ փետրվարի 23-24-ը երկօրյա այցով եղան Վրաստանում։ Դա վարչապետ Կարեն Կարապետյանի առաջին պաշտոնական այցն էր Վրաստան։
Հայկական պատվիրակության կազմում էին առողջապահության նախարար Լևոն Ալթունյանը, մշակույթի նախարար Արմեն Ամիրյանը, գյուղատնտեսության նախարար Իգնատի Առաքելյանը, տրանսպորտի, կապի և տեղեկատվական տեխնոլոգիաների նախարար Վահան Մարտիրոսյանը, տնտեսական զարգացման և ներդրումների նախարար Սուրեն Կարայանը և էներգետիկ ենթակառուցվածքների և բնական պաշարների նախարար Աշոտ Մանուկյանը։
