ԵՐԵՎԱՆ, 27 փետրվարի — Sputnik. Իշխող ՀՀԿ-ի հիմնական նպատակը օրինական ընտրությունների անցկացումն է, լրագրողներին երկուշաբթի ասաց ԱԺ խոսնակ, ՀՀԿ փոխնախագահ Գալուստ Սահակյանը։
Նրա խոսքով` յուրաքանչյուր քաղաքական ուժ` «փոքրից` մեծ» հայտարարում է, որ հաղթելու է ընտրություններում։ «Սա առաջինն է, ինչի մասին խոսում է ընտրություններին մասնակցող ցանկացած քաղաքական ուժ։ Նրանք ասում են, որ կտանեն ձայների մեծամասնությունը, նույնը նաև ես եմ ասում։ Եթե փոքր քաղաքական ուժերն են նման բան ասում, ապա մենք առավել ևս կարող ենք ասել», — ասաց Սահակյանը։
Ըստ Սահակյանի` հանրապետականները այսօր մտածում են ոչ միայն առաջին փուլն անցնելու մասին, այլ որ ընտրություններն անցնեն այնպես, ինչպես ուզում է հայ հասարակությունը։
«Մեզ համար ամենակարևորն այն է, որ ընտրություններն օրինական լինեն», — ասաց Սահակյանը։
Հայաստանում խորհրդարանական ընտրություններն անցկացվելու են ապրիլի 2-ին։
