Իրականում, այսօր արդեն կարելի է փետրվարի 24-ի լույս 25-ի գիշերը արցախա-ադրբեջանական շփման գծում տեղի ունեցած դեպքերն ինչ-որ կերպ մեկնաբանել ու վերլուծել: Այն մի քանի ասպեկտով վերլուծելու կարիք ունի: Խոսքը ոչ միայն ռազմականին է վերաբերում, այլ նաև քաղաքականին, նույնիսկ սոցիալականին, որովհետև այն հանգամանքը, թե ինչպես էր արձագանքել տեղի ունեցածին մեր հարևանի սահմանային այն բնակավայրերի բնակչությունը, որի մոտակայքում տեղի էին ունենում ռազմական գործողությունները, բավականին հետաքրքիր եզրակացությունների տեղիք տվեց։
Իրականում, տեղի ունեցած դեպքերն ինչ-որ տեղ անցյալ տարվա նույն ժամանակահատվածում կատարվածի հետ կարելի է համեմատել։ Բայց միայն մասամբ, միայն ինչ-որ տեղ… Հիշում եք չէ՞, որ 2016-ի սկզբին` ձմռանը, նույնպես մի շարք դիվերսիոն գործողություններ տեղի ունեցան արցախա — ադրբեջանական շփման գծում։ Հիշո՞ւմ եք չէ, որ այդ լարվածությունն ի վերջո ապրիլյան քառօրյա արյունալի պատերազմական գործողություններով ավարտվեց։
Ըստ տրամաբանության, երևի թե հիմա էլ կարելի է ենթադրել, որ դեպքերը նույն ուղիով կարող են ընթանալ: Ու երբ եղանակը լրիվ կայունանա, այսինքն` ձյունը հալվի ու արցախյան դաշտավայրերը հարմար դառնան զրահատեխնիկայի տեղաշարժի համար, ադրբեջանցիներն, անպայման, հերթական ռազմական առճակատման փորձը կկատարեն։
Փորձագետ — վերլուծաբանների մի մասը հենց այդպես էլ ենթադրում է, ու պաշտոնական Բաքուն, ի դեպ, իր վարքագծով նման ենթադրությունների տեղիք տալիս է:
Սակայն, կարծում եմ, որ այս անգամ, եթե հակառակորդը փորձի նույն ռազմավարությունը կիրառել շփման գծում, ապա մի շարք տհաճ անակնկալների կհանդիպի:
Հիշեք, թե ինչ տեսանյութեր էր տարածել մեր պաշտպանության նախարարությունը Մարտունու ու Ակնայի գիշերային դեպքերից հետո։
Հայկական կողմը, փաստորեն, ամբողջ շփման գծի երկայնքով այնպիսի սարքավորումներ ունի, որոնք նաև գիշերվա ժամերին բավականին մեծ հեռավորության վրա հետևում են, թե ինչ է կատարվում շփման գծի այն կողմում և գրանցում անգամ փոքրիկ դիվերսիոն խմբերի տեղաշարժերը։
Այն հանգամանքը, որ ադրբեջանական դիվերսիոն խմբի տեղաշարժերը գիշերով, մթին, կիլոմետրից ավելի հեռավորության վրա է ֆիքսվել, շատ բանի մասին է խոսում:
Այս փաստարկը շատ կարևոր է թե՛ ռազմական տեսանկյունից, քանի որ ռազմադաշտում նույնիսկ րոպե առաջ ստացած տեղեկություն անչափ կարևոր է, թե՛ քաղաքական առումով. հիմա այլևս հակառակ կողմը չի կարող պնդել, որ հայկական կողմն է նախահարձակ եղել։
Ինչևէ, փաստը մնում է փաստ` այս անգամ ամեն ինչ ժամանակին է արվել, ու թե՛ մեր հրազենի ու ականանետների գործողությունները, թե՛ դրանց հետևանքները վայրկյան առ վայրկյան են ֆիքսած տեսանյութում:
Այսինքն` արձանագրում ենք` այս անգամ հայկական հետախուզությունը հիանալի է աշխատել: Ու քանի որ նաև ժամանակակից սարքավորումներ են կիրառվել, ապա հակառակորդի առաջխաղացումը հենց սկզբից է հայտնի դարձել: Իսկ եթե ժամանակին է հայտնի դարձել, ապա նաև էֆեկտիվ ձևով կանխվել է: Ինչպես ռուսներն էն ասում — на дальних подступах…
Մյուս հանգամանքը. հակառակորդը առնվազն 7 զոհ է տվել (պաշտոնապես 5-ի մասին է խոսվում)։ Ու զոհվածների դիերն էլ, ի դեպ, առնվազն 2 — 3 օր չեզոք գոտում են մնացել. դա նույնպես գրանցված է: Այսինքն` այս անգամ Բաքուն արդեն չի կարող պնդել, թե հայկական կողմն է նախահարձակ եղել։ Ամեն ինչ հատիկ-հատիկ գրանցված է համապատասխան սարքերում։
