ԵՐԵՎԱՆ, 26 փետրվարի — Sputnik. Լիբանանյան mtv հեռուստալիքի եթերում հնչել է «Սարերի հովին մեռնեմ» հայկական ժողովրդական երգը՝ հայտնի արաբ երգչուհու հիանալի կատարմամբ:
Թոք շոուի եթերում կենդանի կատարումից առաջ երգչուհու և հաղորդավարի միջև փոքր, բայց հետաքրքրիր երկխոսություն է կայացել:
«Դուք բոլորդ գիտեք, որ արդեն երկար տարիներ է՝ հայերն ու ադրբեջանցիները պատերազմում են»,- սկսել է իր ելույթը երգչուհին, բայց շոուի հաղորդավարն արագ ընդհատել է նրան՝ կեսկատակ հայտարարելով՝ «Ես հայերի կողմից եմ»:
«Երաժշտությունը միակ բանն է աշխարհում, որը կարող է միավորել ցանկացած ազգության մարդկանց»,- շարունակել է երգչուհին, և հաղորդավարը նրան կրկին ընդհատել է «Ես հայերի կողմից եմ» արտահայտությամբ:
Երգչուհին ժպտացել է և պատասխանել՝ «ես նույնպես», որից հետո կատարել է նուրբ և հուզիչ երգը:
Ի դեպ, նա երգը հիանալի է կատարել ոչ միայն երաժշտական, այլ նաև մաքուր առոգանության տեսանկյունից:
