ԵՐԵՎԱՆ, 26 փետրվարի — Sputnik. Արցախը հաղորդել է, որ ադրբեջանական զինուժը ինտենսիվ կրակ է բացել հայկական դիրքերի ուղղությամբ և հերքել է Ադրբեջանի տարածած լուրն այն մասին, թե նրանք հայկական անօդաչու սարք են խոցել։
«Երեկ գիշերը Ակնայի և Մարտունու ուղղություններում կրած կորուստներից հետո, մանավանդ, որ դրանցից հինգի դիակը դեռևս ընկած են չեզոք գոտում, թվում էր, թե հակառակորդը պիտի որ հետևություն կատարեր և, գոնե, որոշ ժամանակ ձեռնպահ մնար իրադրությունն արհեստականորեն սրելու մտադրությունից, սակայն դա տեղի չունեցավ»,- իր ֆեյսբուքյան էջում գրել է Արցախի պաշտպանության նախարարի մամուլի քարտուղար Սենոր Հասրաթյանը:
Ըստ Սենոր Հասրաթյանի՝ ադրբեջանական կողմն, իր սովորության համաձայն, հնարածին տեղեկություններով շարունակեց կերակրել սեփական հանրությանը՝ ներկայացնելով, թե իբր փետրվարի 25-ին խոցել են հայկական ԱԹՍ և մեկ երկարաժամկետ կրակակետ (ДОТ)։
Բացի այդ, այս գիշերվա ընթացքում Ադրբեջանն ականանետային և հեռահար հրետանային միջոցներից հարյուրից ավելի անգամ արկակոծության է ենթարկել ՊԲ առաջնագիծն ու մերձակա խորության տարածքները։
Նա նշել է, որ այսքանից հետո առողջ տրամաբանությունը հուշում է, որ մենք գործ ունենք ոչ միայն նենգ և իրականության զգացողությունից զուրկ կողմի (դրանում վաղուց ենք համոզվել), այլ նաև սեփական զինվորի դիակի հանդեպ հարգանքը կորցրած թշնամու հետ:
