ԵՐԵՎԱՆ, 25 փետրվարի — Sputnik. Ֆրանսերենով հրատարակված «15 հարց, 15 պատասխան, ամեն ինչ իմանալ ԼՂՀ մասին 10 րոպեում» գիրքն Արցախի մասին ճշգրիտ տեղեկատվություն կտարածի ֆրանսախոս հասարակության շրջանում։
Արցախում Սահմանադրության փոփոխությունից հետո անվանափոխվել և Ֆրանսիա-Արցախ է արդեն կոչվում Ֆրասիա-Ղարաբաղ բարեկամության շրջանակը: Այս մասին տեղեկացրեց շնորհանդեսին ներկա գտնվող Ֆրանսիա-Արցախ բարեկամության շրջանակի նախագահ Ֆրանսուա Ռոշբլուանը: Նա իր ելույթում ողջունեց Արցախում նոր Սահմանադրության նախագծի վերաբերյալ հանրաքվեի անցկացումը: Հանդիպման ընթացքում հարգանքի տուրք է մատուցվել ադրբեջանական իշխանությունների կողմից կազմակերպված հայերի ջարդերի զոհերին և 2004 թ․ փետրվարի 19-ին ադրբեջանցի սպա Ռ. Սաֆարովի կողմից կացնահարված Գուրգեն Մարգարյանին:
Միջոցառմանը մասնակցում էին նաև Ֆրանսիայի խորհրդարանի մի շարք պատգամավորներ, սենատորներ, Ֆրանսիայում ՀՀ դեսպան Վիգեն Չիտեչյանը, Արցախի Հանրապետության ներկայացուցիչ Հովհաննես Գևորգյանը, քաղաքապետեր և ԶԼՄ ներկայացուցիչներ։
