ԵՐԵՎԱՆ, 24 փետրվարի — Sputnik. Փաստաբանների պալատի նախագահը ՀՀ արդարադատության նախարարության և ՔԿՀ վարչության պետի հետ քննարկել և արձանագրել է այն նվազագույն պայմանները, որոնք ՔԿՀ աշխատակիցները պետք է հաշվի առնեն փաստաբանների հետ աշխատելիս։
Քննարկումների արդյունքում Արա Զոհրաբյանը ներկայացրել է օրենքի պահանջով հիմնավորված փաստարկներ, որոնց համաձայն` փաստաբանն ազատ է ՔԿՀ տարածք անցկացնել քրեական գործի հետ առնչվող նյութեր, որոնց զննության դեպքում ՔԿՀ աշխատակիցները պարտավոր են գաղտնիությունն ապահովել:
Այսպես, ըստ Փաստաբանների պալատի տարածած հաղորդագրության` Սահմանադրության 16-րդ հոդվածի և «Փաստաբանության մասին» ՀՀ օրենքի 21-րդ հոդվածի համաձայն փաստաբանին չի կարելի խուզարկել, քանի որ փաստաբանի մոտ գտնվող փաստաթղթերը կարող ենք փաստաբանական գաղտնիք պարունակել: ՔԿՀ աշխատակիցն էլ չի կարող տարբերակել՝ նյութը քրեական գործին առնչվում է, թե ոչ, հետևաբար փաստաբանի մոտ առկա նյութեր զննելը չի կարող օրինական նպատակ հետապնդել:
Փաստաբանի համակարգիչը վերցնելը ևս փաստաբանների համոզմամբ, իրավաչափ չէ, քանի որ իր վստահորդի հետ աշխատելիս նա հիմնականում պետք է օգտվի համակարգչից: Ինչ վերաբերում է փաստաբանի նյութերը ՔԿՀ պահախցերում պահելուն, Փաստաբանների պալատի նախագահը կարծում է, որ դրանք վստահություն չեն ներշնչում, քանի որ ՔԿՀ աշխատակիցը ֆիզիկապես կարող է բացել այն և ծանոթանալ նյութերին։
Փաստաբանների պալատի նախագահը համարում է, որ ՔԿՀ-ում փաստաբանին կարող են զննել միայն ողջամիտ կասկածի դեպքում։
«Օրինակ, եթե մետաղորսիչ սարքն ազդանշան է տվել, ապա ՔԿՀ աշխատակիցը կարող է զննել փաստաբանի իրը՝ պահպանելով փաստաբանի իրավունքները և հարգելով փաստաբանի արժանապատվությունը»,- կարծում է Զոհրաբյանը։
Բայց այս դեպքում զննության կարգը պետք է տարածվի բոլորի վրա։ Եթե փաստաբանին զննում են, իսկ քննիչին՝ ոչ, ապա փաստաբանն էլ պետք է հրաժարվի զննության ենթարկվելուց և այդ մասին տեղեկացնի Փաստաբանների պալատին:
Ի դեպ, ՔԿՀ-ն էլ այս հարցի վերաբերյալ իր փաստարկներն է ներկայացրել՝ պնդելով, որ ՔԿՀ աշխատակիցը իրավունք ունի և պետք է խուզարկի փաստաբանին: Ըստ ՔԿՀ-ի՝ փաստաբանն իրավունք չունի արգելված իրեր անցկացնել ՔԿՀ տարածք, այդ թվում՝ քրեական գործի նյութերին չառնչվող փաստաթղթեր: Դրանց՝ քրեական գործին առնչվել-չառնչվելն էլ պետք է որոշի ՔԿՀ աշխատակիցը:
ՔԿՀ-ն իր այս տեսակետը հիմնավորում է այն կասկածով, որ նյութերի մեջ կարող են թաքստոցներ լինել, որոնց միջոցով փաստաբանն իր վստահորդին ինչ-որ բան փոխանցի: ՔԿՀ ղեկավարությունը նշում է, որ նախկինում նման դեպքեր եղել են:
Ուստի բոլոր այն նյութերը, որ ՔՀԿ աշխատակիցը թույլ չի տա ներս տանել, պետք է պահվեն պահախցերում:
