ԵՐԵՎԱՆ, 24 փետրվարի — Sputnik. Երբ համայնքապետը ցանկանում է, մեծացնում է սեփական եկամուտների մուտքը։ Այս համոզմունքն արտահայտեց տարածքային կառավարման և զարգացման նախարար Դավիթ Լոքյանը Հայաստանի համայնքների միության անդամների ընդհանուր ժողովի մեկնարկին։
«Եթե ոչ, ստիպված պետք է լինեք տասնամյակներով մի քանի կոպեկ պետական դոտացիա ստանալ, այսպես գոյատևել ու դժգոհության մեջ պահել քաղաքացիներին»,-ասաց նա։
Դիմելով համայնքապետներին`նախարարը հորդորեց ընտրությունների ժամանակ արջի ծառայություններ չմատուցել։
«Համապետական ընտրությունների ժամանակ համայնքապետները պետք է այնպիսի դիրքում լինեն, որ արջի ծառայություններ չմատուցեն քաղաքական ուժերին»,- ասաց Լոքյանը։
Ճի՞շտ են այն լուրերը, թե համայնքներում գումար են բաժանում։ Լրագրողների այս հարցին Լոքյանը պատասխանեց, որ նման բաների չի հավատում։
«Ես կուզենամ, որ մեր համայնքապետները զերծ մնան այս խեղաթյուրված ընտրական պրոցեսներից և արժանապատվորեն գնան ընտրությունների: Եվ եթե կողմնորոշելու են իրենց համայնքի մարդկանց, ապա անեն քաղաքական հստակ ձևակերպումներով և ծրագրերով»,- ասաց Լոքյանը։
Թեմայի վերաբերյալ խոսեց նաև ժողովին մասնակցող Երևանի քաղաքապետ Տարոն Մարգարյանը։
«Թաղապետները կուսակցական են։ Երբ սկսվի քարոզարշավը, ցանկություն ունենան ակտիվ քարոզչություն իրականացնելու, մենք օրենքով սահմանված կարգով դա կապահովենք»,-ասաց քաղաքապետը։
Քաղաքապետը վստահություն հայտնեց, որ հանրապետականներն իրար դեմ չեն մրցակցում։
