ԵՐԵՎԱՆ, 24 փետրվարի — Sputnik. ԵԱՏՄ անդամ երկրների միջև ծագող տարաձայնություններն ինտեգրման նորմալ գործընթացի մաս են, ուրբաթ Բեռլինում լրագրողներին ասել է Եվրասիական տնտեսական հանձնաժողովի կոլեգիայի ղեկավար Տիգրան Սարգսյանը։
Նա մասնակցել է ԵԱՏՄ-ի նկատմամբ գերմանական բիզնեսի վերաբերյալ հարցման շնորհանդեսին, որն անցկացրել են Գերմանական տնտեսության արևելյան հանձնաժողովը և Գերմանա-ռուսական արտաքին առևտրի պալատը։ Հարցման համաձայն, գերմանացի գործարարների շուրջ երեք չորրորդը, որոնք աշխատում են Ռուսաստանում, հանդես են գալիս արտաքին առևտրի ոլորտում Եվրամիության և ԵԱՏՄ-ի միջև համագործակցության օգտին։
«Ակնհայտ է, որ առկա է շահերի բախում։ Սակայն մենք ունենք ինտեգրման գործընթաց, որը պետք է անցնենք, որովհետև կան արգելքներ և սահմանափակումներ, որոնք խոչընդոտում են մեր ընդհանուր շուկայի լիարժեք իրագործմանը»,- ասել է Սարգսյանը և ավելացրել, որ դա բնական գործընթաց է, թեև` ցավոտ։
Սարգսյանի խոսքով` ԵՄ-ի փորձը շատ արժեքավոր և կարևոր է ԵԱՏՄ-ի համար` այդ տարաձայնությունները հաղթահարելու համար, որոնք, նրա կարծիքով, կարող են ծագել առաջիկայում։
«Մենք ուշադիր ուսումնասիրում ենք այդ փորձը, այն տարաձայնությունները, որոնք եղել են Եվրամիությունում, օրինակ, Գերմանիայի և Ֆրանսիայի միջև կոնկրետ վեճեր են ընթացել»,- ասել է։
Եվրասիական տնտեսական միությունը տարածաշրջանային տնտեսական ինտեգրման միջազգային կազմակերպություն է։ Անդամ պետություններն են Հայաստանը, Բելառուսը, Ղազախստանը, Ղրղըզստանը և Ռուսաստանը: ԵԱՏՄ-ն ստեղծվել է ազգային տնտեսությունների բազմակողմանի արդիականացման, կոոպերացիայի, մրցունակության բարձրացման և անդամ պետությունների բնակչության կենսամակարդակի բարձրացման համար կայուն պայմաններ ստեղծելու նպատակով:
