«Քաղաքացի-դիտորդ» նախաձեռնության ներկայացուցիչ Արմեն Գրիգորյանը Sputnik Արմենիային պատմում է կազմակերպության գործունեության մասին ու ներկայացնում իրենց փորձը:
-Պարոն Գրիգորյան, վերջին տվյալներով 2800 գրանցված դիտորդ կա արդեն: Ովքե՞ր են նրանք, ի՞նչ սկզբունքով են հավաքագրվում և ի՞նչ աշխատանք են անելու ի վերջո:
Հավաքագրումը կատարում ենք երկու ճանապարհով: Ունենք կայք, որի միջոցով հայտարարություն է տարածվում: Համապատասխան հղումով քաղաքացիները մտնում և գրանցվում են: Մենք ստանում ենք տվյալները, ուսումնասիրում և սկսում ենք աշխատել նրանց հետ:
Բացի այդ, մեր ընկերները, մենք դիմում ենք մարդկանց, որոնց ճանաչում ենք և գիտենք, որ նրանք կարող են հանդես գալ այդ դերում, առաջարկում ենք դառնալ քաղաքացի դիտորդ: Այս պահին գրանցվածների հիմնական մասը ՀՀ տարածքում ապրող մարդիկ են, բայց նաև կան քաղաքացիներ սփյուռքից՝ այս պահին մոտ 250 մարդ: 2800 գրանցված դիտորդներից մոտ 2000-ի համար մենք արդեն կազմակերպել ենք թրեյնինգներ:
-Ապրիլի 2-ին 2000-ից ավելի տեղամաս կլինի հանրապետությունում, կհասցնե՞ք բոլոր տեղամասերում ունենալ դիտորդներ:
Մոտ 2000 ընտրատեղամասից 1750-ում մենք կներգրավենք 3500 դիտորդի, ամեն ընտրատեղամասում՝ երկուական: Դա նշանակում է ընտրողների մոտ 98 տոկոսի քվեարկության պրոցեսը վերահսկողության տակ կլինի:
-Ասացիք, որ նաև սփյուռքից ներգրավվածություն կա: Գիտենք, որ հայտնի մարդիկ են դիտորդական առաքելություն իրականացնելու՝ Արսինե Խանջյան, Ատոմ Էգոյան, Սերժ Թանկյան, ինչպե՞ս եք գործակցում նրանց հետ:
Մենք մի քանի հանդիպում ենք ունեցել Արսինե Խանջյանի հետ, որը կապի մեջ է և՛ Ատոմ Էգոյանի, և՛ Սերժ Թանկյանի հետ: Փորձում ենք համատեղ կոորդինացնել աշխատանքը: Մենք կոչով հանդես ենք եկել, և սփյուռքը պատրաստակամություն է ցուցաբերում մասնակցելու:
-Նախկինում «Քաղաքացի դիտորդի» ներկայացուցիչները բոլորովին այլ տեսակի ընտրության են հետևել: Հիմա, ըստ էության, ընտրողի համար բարդացել է գործընթացը, դիտորդի վրա փոփոխություններն ինչպե՞ս են անդրադառնում:
Իրականում, ընտրական ընդհանուր գործընթացն է բարդացել, բայց մենք էլ ենք մեր աշխատանքի ձևը փոխել: Եթե նախկինում դիտորդների համար մեկ դասընթաց էինք անցկացնում, ապա այս անգամ կունենաք 2 դասընթաց, որպեսզի ամբողջ մեխանիզմը կարողանանք ներկայացնել նրանց:
-Պարոն Գրիգորյան, հատկապես ի՞նչ խախտումների վրա պետք է իր ուշադրությունը սևեռի քաղաքացի դիտորդը: Դուք ունե՞ք ցանկը, թե հատկապես, որ դեպքերում պետք է ահազանգել:
Օրինակ՝ օրենքին համապատասխան ընտրատեղամասում պետք է համապատասխան քանակի քվեատուփ լինի, իրարից համապատասխան հեռավորությամբ, հետևելու ենք դրան ու ոչ միայն դրան:
Մեր նպատակն է, որ ընտրական գործընթացն անցնի օրենքի տառին համապատասխան:
Իհարկե, ունենք համապատասխան ցուցակ, թե որոնք են հիմնական ընտրախախտումները, որոնց նախկինում հանդիպել ենք և մտավախություն ունենք, որ այս անգամ էլ կարող են կրկնվել: Դրանց մասին մեր դիտորները տեղեկացված են:
-Կամավորության սկզբունքով են ձեր դիտորդները մասնակցում ընտրությանը, կասեք՝ ի՞նչ երաշխիք, որ ինչ-որ մի պահի, ինչ-որ շահից ելնելով նրանք չեն փոխի իրենց առաքելության նպատակը:
Մեր երկարամյա փորձը օգնում է ընտրական գործընթացում հնարավորինս ներգրավել այնպիսի մարդկանց, որոնք միայն կկատարեն իրենց քաղաքացիական պարտքը: Եթե իրենք շեղվում են իրենց առաքելությունից, քաղաքական օրակարգ են սկսում թելադրել, մենք հրաժարվում ենք նրանցից: Սահմանադրական հանրաքվեի ժամանակ, օրինակ, մոտ 1000 դիտորդ ենք ունեցել և ընդամենը արձանագրել ենք 2-3 նման խնդիր:
