ԵՐԵՎԱՆ, 22 փետրվարի — Sputnik. Իլյուզոնիստ Ռոման Խալաֆյանը Sputnik Արմենիայի մուլտիմեդիոն կենտրոնում կայացած տեսակապի ժամանակ պատմեց, որ հաճախ է դիմում իր արվեստին, որպեսզի տպավորություն գործի աղջիկների վրա։
«Անկասկած, ես օգտվում եմ դրանից։ Չեմ թաքցնի… բայց լավ իմաստով։ Ինչպես արդեն հասկացաք «Փառքի րոպե» շոուից, եթե ես ցանկանամ իմանալ աղջկա հեռախոսահամարը, ապա կիմանամ այն, իսկ հետո կպահպանեմ ինձ մոտ», — ասաց Խալաֆյանը։
Աճպարարը նշեց, որ կատակը մի կողմ, բայց նա լուրջ է վերաբերվում հարաբերություններին։ «Սկզբում ուրախանում ես, որ տարբերվում ես ուրիշներից, կարող ես մոտենալ աղջկան և միանգամից զարմացնել նրան։ Երբ շատ տղաներ կասկածում են` մոտենալ, թե ոչ, ես պարզապես մոտենում եմ, ողջունում, ասում անունս և որևէ հնարք ցույց տալիս»։
Պատասխանելով այն հարցին, թե Ռոմանն ունեցե՞լ է արդյոք «առանց ֆոկուսների սիրավեպ», նա ասաց, որ հիմա ընկերուհի չունի։
«Ծանոթներիս մեկը մի անգամ ասաց. «Ամենագլխավորը խարիզման է, որը քո մեջ կա։ Քո արվեստը կազմված է երկու գործոնից` տեխնիկա և խարիզմա։ Աղջիկների հետ շփման ժամանակ տեխնիկան մի կողմ թող, խարիզման օգտագործի»», — ասաց Խալաֆյանը։
Նա խոստովանեց, որ կենցաղում երբեք չի օգտագործում իր վարպետությունը և հատուկ հնարքներ չի բանեցնում անհրաժեշտ տեղեկանք ստանալու կամ խանութի հերթից խուսափելու համար։ Երիտասարդ աճպարարը պատմեց, որ միայն մեկ անգամ է օգտագործել իր հմտությունները, այն էլ 9-րդ դասարանում` մաթեմատիկայի քննության ժամանակ։ Տնօրենը նկատել է Ռոմանի հուշաթերթիկը և վերցրել այն։ Այդ ժամանակ Ռոմանը որոշել է հետ վերցնել թերթիկը։
«Ինձ սկսեցին ծաղրել, թե ես ինչ աճպարար եմ, որ չկարողացա հուշաթերթիկս թաքցնել տնօրենից: Ես էլ մոտեցա տնօրենին ինչ-որ բան ճշտելու պատրվակով և աննկատ վերցրի հուշաթերթիկս։ Երբ աշխատանքս գրեցի և հանձնեցի, տնօրենն ասաց. «Ապրես, Խալաֆյան, ամեն ինչ գրել ես։ Իսկ հիմա ինչ-որ ֆոկուս ցույց տուր»։ Այդ ժամանակ ես ցուցադրաբար հանեցի հուշաթերթիկը և դրեցի սեղանին», — պատմեց նա։
Իլյուզիոնիստի խոսքով` դրանից հետո ուրիշ ոչ մի անգամ հնարքների չի դիմել իր նպատակին հասնելու համար։
Մոսկվայում բնակվող 20-ամյա Ռոման Խալաֆյանը մասնակցում է ռուսական Առաջին ալիքի եթերում հեռարձակվող «Փառքի րոպե» նախագծին` նվաճելով ժյուրիի և հանդիսատեսի համակրանքը։ Նա արդեն հաղթահարել է առաջին փուլը և անցել հաջորդ փուլ, այժմ պատրաստվում է նոր ելույթին։
