ԵՐԵՎԱՆ, 22 փետրվարի — Sputnik. Ռուսաստանից անցյալ տարի բերված «Իսկանդեր» հրթիռային համալիրները պատկանում են Հայաստանի ԶՈՒ-ին, և դրանք կառավարում են հատուկ պատրաստվածություն անցած հայկական զինված ուժերի սպաները, ՌԻԱ Նովոստիին տված հարցազրույցում հայտնել է ՀՀ ՊՆ ղեկավար Վիգեն Սարգսյանը։
«Իսկանդերներն» առաջին անգամ ցուցադրվել են անցյալ տարի սեպտեմբերի 21-ին՝ Հայաստանի անկախության 25-ամյակի կապակցությամբ Երևանում անցկացրած ռազմական շքերթի ժամանակ։ Սակայն որոշ տվյալների համաձայն` դրանք համալրել են հայկական ԶՈՒ սպառազինությունը ավելի վաղ և մարտական պատրաստվածության են բերվել անցյալ տարվա ապրիլին Լեռնային Ղարաբաղի հակամարտության սրացման ժամանակ։ Ավելի ուշ որոշ ԶԼՄ-ներ ենթադրություններ են արել, թե համալիրները նախկինի պես պատկանում են ՌԴ-ին։
«Այն, որ «Իսկանդերները» Հայաստան են բերվել, իմ կարծիքով, ակնհայտ է բոլորի համար, քանի որ դրանք տեսել են բոլորը։ Այն, որ դրանք պատկանում են Հայաստանի ԶՈՒ-ին, նույնպես կարող եմ հավաստել հարյուրտոկոսանոց վստահությամբ։ Այստեղ երկրորդ կարծիք լինել, պարզապես, չի կարող։ Ինչ վերաբերում է բոլոր մյուս հարցերին` թե երբ, ինչ միջոցներով, ինչ վճարման ժամկետների պայմաններում և այլն, ինչպես հասկանում եք, այդ ամենը խիստ գաղտնիք է։ Մենք ենք կառավարում, կառավարում են նրանք, ում դրանք պատկանում են։ Այս կապակցությամբ գաղտնիքը բացել կարող եմ»,- ասել է նախարարը։
Արդյո՞ք համալիրների կառավարումը գտնվում է ՀՀ ԶՈՒ հատուկ պատրաստվածություն անցած սպաների ձեռքում՝ ճշգրտող հարցին ի պատասխան` Սարգսյանը պատասխանեց. «Միանշանակ»։
