ԵՐԵՎԱՆ, 22 փետրվարի — Sputnik. Թուրքիայի փորձերը` կապված Հայաստանի և Ադրբեջանի հարաբերություններում միջնորդի դերում ներկայացնելու հետ, հեգնանքից բացի, այլ բան չի առաջացնում, ՌԻԱ Նովոստիին տված հարցազրույցում ասել է ՀՀ պաշտպանության նախարար Վիգեն Սարգսյանը։
Նրա խոսքով` անկախ «Վրաստանի և Ադրբեջանի հետ բարեկամական հարաբերություններից, Թուրքիան իսկապես շարունակում է տարածաշրջանային խաղից դուրս մնալ, քանի որ հնարավոր չէ խաղացող մնալ Հարավային Կովկասում` փակ սահման և Հայաստանի հետ զրոյական հարաբերություններ ունենալով»։
«Այդ իսկ պատճառով ես կարծում եմ, որ այն, ինչ անում է Թուրքիան, և այն, ինչ ծրագրում է Ադրբեջանը Թուրքիայի հետ, ակնհայտորեն ուղղված է տարածաշրջանի շահերի դեմ։ Մեզ համար սա ակնհայտ է, ինչպես ակնհայտ է այն, որ Թուրքիայի` Հայաստանի և Ադրբեջանի որոշակի գործընթացների միջև իրեն որպես հավանական միջնորդ և համակարգող ներկայացնելու կանոնավոր փորձերը, հեգնանքից բացի, ուրիշ ոչինչ առաջացնել չեն կարող»,- ասել է Սարգսյանը։
Թուրքիայի և Հայաստանի միջև բացակայում են դիվանագիտական հարաբերությունները, 1993 թվականից պաշտոնական Անկարայի նախաձեռնությամբ փակ է երկու երկրի միջև սահմանը։ Բարդ հարաբերությունները պայմանավորված են մի շարք հանգամանքներով, մասնավորապես Անկարան ղարաբաղյան հարցում աջակցում է Ադրբեջանին և սուր է արձագանքում Օսմանյան կայսրությունում 1915 թվականին իրականացրած Հայոց ցեղասպանության միջազգային ճանաչման գործընթացին։
