ԵՐԵՎԱՆ, 21 փետրվարի — Sputnik. «Զվարթնոց» օդանավակայանի կլոր մասնաշենքի հեղինակ, ճարտարապետ Ժորժ Շեխլյանը հին «Զվարթնոցի» պահպանման ու ընդլայնման իր նոր նախագիծն է ներկայացրել Մեդիամաքսին:
Այսպիսով, Ֆրանսիայում բնակվող Ժորժ Շեխլյանը ցանկանում է իր նախագիծը հասցնել նաև պատկան կառույցներին` մշակույթի նախարարությանը, Քաղաքաշինության պետական կոմիտեին, Երևանի գլխավոր ճարտարապետին, Քաղավիացիայի վարչությանն ու կոնցեսիոներին: Շեխլյանը հույս ունի, որ կառավարության փոփոխությունից հետո Հայաստանում տեղի ունեցող բարեփոխումներին ֆոնին` նոր վարչապետն ու մշակույթի նախարարը հետամուտ կլինեն այս հարցի լուծմանը:
Ճարտարապետը «Զվարթնոցի» հին մասնաշենքի ընդլայնման արդեն չորրորդ նախագիծն է առաջարկում։ Նախորդ նախագծերը ներկայացնելու համար նա եկել էր Հայաստան` դրանք անձամբ շահագրգիռ բոլոր կողմերին ներկայացնելու: Սակայն, այն ժամանակ այդպես էլ որևէ կոնկրետ պատասխան եւ որոշում չէր հնչել, գրել է Մեդիամաքսը:
Նոր տարբերակում ընդլայնված է «Զվարթնոց» օդանավակայանի նոր համալիրի մեկնման սրահի երկայնական առանցքի հատումը մինչև կլոր համալիրի հարավ-արեւելք, հյուսիս-արեւմուտք առանցքին:
«Այս տարբերակում, իմ կարծիքով, համալիրի ծավալներն ավելի ներդաշնակ են։ Ընդլայնման նոր տարբերակը նախատեսվում է իրականացնել երկու տարում (կոնցեսիոների մաստեր պլանում` 4 տարի է): Եթե կոնցեսիոների ընդլայնման մաստեր պլանը պահանջում է $ 101 մլն ներդրում, ապա իմ նոր տարբերակը` $ 15-20 մլն»,- ասել է ճարտարապետը: Ավելին, նա վստահ է, որ իր առաջարկն ընդունելու դեպքում «Զվարթնոց» օդանավակայանի ուղևորափոխադրումը տարեկան կլինի 6 մլն, մինչդեռ կոնցեսիոների մաստեր պլանում նախատեսված է 4 մլն մարդ:
Կոնցեսիոների մաստեր պլանում առկա 5 կայանատեղիներին ավելացվելու է ևս 5-ը, իսկ Ժորժ Շեխլյանն առաջարկում է օգտագործել կլոր մասնաշենքը, որտեղ կարելի է 15 կայանատեղի ունենալ:
Այս նախագծում, ինչպես նախորդ երեքում, Ժորժ Շեխլյանն առաջարկում է Կենտրոնական մասնաշեքն իր աշտարակով օգտագործել որպես հյուրանոցային, զվարճանքների եւ առևտրի համալիր:
