ԵՐԵՎԱՆ, 21 փետրվարի — Sputnik, Անի Լիպարիտյան. Առաջին «էկզոտիկ» տրամվայները գործել են ընդհուպ մինչև 1918 թվականը` միացնելով Աբովյան փողոցը Կայարանի հետ։ Երևանի պատմության թանգարանում պահպանվել են ձիերով լծված տրամվայի առաջին տոմսերը ։
Sputnik Արմենիային տված հարցազրույցում Երևանի պատմության թանգարանի տնօրեն Արմինե Սարգսյանը պատմեց, որ տոմսի գինն այն ժամանակ ընդամենը հինգ կոպեկ էր։
«Ուղևորներն անդադար բողոքում էին տրամվայի աշխատանքային ժամերից, դրանք նշված ժամանակին տեղ չէին հասնում, և մարդիկ ստիպված էին երկար սպասել», — նշեց Սարգսյանը։
Սակայն, նրա խոսքով, խնդիրը միայն ձիերի մեջ չէր, որոնք հաճախակի շեղվում էին ճանապարհից, ռելսերից, այլև ուղևորների, որոնք նույնպես ուշանում էին և ստիպում բոլորին սպասել նրանց։
«Հետաքրքիր է, որ այն տարիներին ձիերով լծված տրամվայի ծառայություններից օգտվում էին առավելապես տղամարդիկ, քանի որ XX դարի սկզբին այլ բարքեր էին տիրում, և կանայք ամաչում էին տղամարդկանց հետ նույն վագոնը նստել», — պատմեց թանգարանի տնօրենը։
Սարգսյանն ավելացրեց, որ նույնիսկ Երևանի պատմության թանգարանում պահպանվող այդ տրամվայի մակետում տղամարդիկ են նստած, ենթադրաբար իրանցիներ, ովքեր այդ տարիներին Հայաստանում էին ապրում։
Հայ կանայք և աղջիկները չէին ցանկանում տրամվայից օգտվել, քանի որ դրանցից օգտվում էին նաև մահմեդական տղամարդիկ։
Այդ տեսակ տրամվայի գծերը գործել էին մինչև 1918 թվականը, դրանից հետո տրամվայը, որպես տրանսպորտի տեսակ, վերացավ, չնայած որ ռելսերը դեռ պահպանվում էին։ 1933 թվականին այդ համակարգը վերականգնվեց, սակայն արդեն առանց ձիերի։
Երևանում տրամվայի երկու տեսակ էր գործում` 71-605 և РВЗ-6М2, որոնց մակետները պահպանվում են Երևանի պատմության թանգարանում։
XX դարի երկրորդ կեսին Երևանի տրամվայը մինչև 12 երթուղի ուներ, որոնց երկու դեպո էր սպասարկում։ Տրամվայի գիծը փակվեց 2004 թվականի հունվարի 21-ին։ Երևանի տրամվայի համակարգի փակման պահին ընդամենը մեկ երթուղի էր գործում։
