10 փաստ Ատոմ Էգոյանի մասին

Էգոյանի եգիպտահայ ծնողները` Ջոզեֆ Յեղոյանը և Շուշան Դևլեթյանն իրենց որդուն անվանել են Ատոմ` ի նշան Եգիպտոսում միջուկային ռեակտորի շինարարության ավարտի:

Էգոյանը պատմում է, որ երիտասարդ ժամանակ ի նշան բողոքի հրաժարվել է հայերեն խոսել այն բանից հետո, երբ հայրենիքի հետ կապը խորհրդանշող սիրելի տատիկին տեղափոխել են ծերանոց:

Նկարիչ Արշիլ Գորկու կերպարն այնքան հոգեհարազատ է Էգոյանի համար, որ ռեժիսորը ոչ միայն Գորկուն «Արարատ» ֆիլմի գլխավոր հերոս է դարձրել, այլ նաև նրա պատվին որդուն կոչել է Արշիլ:

Շվեդ ռեժիսոր Ինգմար Բերգմանի «Պերսոնան» Էգոյանը համարում է բոլոր ժամանակների իր ամենասիրելի ֆիլմը:

Էգոյանի կինն է լիբանանահայ դերասանուհի Արսինե Խանջյանը, իսկ քույրը` հայտնի դաշնակահարուհի Իվ Էգոյանը:

Էգոյանն առանձնակի սեր ունի դասական երաժշտության հանդեպ: Այսպես` 6 մասանոց «Ոգեշնչված Բախով» մրցանակակիր հեռուստաալմանախի «Սարաբանդա» ֆիլմը` աշխարհահռչակ թավջութակահար Յո-Յո Մայի մասնակցությամբ, նկարահանել է Ատոմ Էգոյանը։

Էգոյանի կարիերայում կա մեկ այլ կարևոր ալմանախ` «Յուրաքանչյուրն իր կինոն ունի» անվանումով, որի նկարահանումների համար Կաննի կինոփառատոնը հրավիրել էր 36 ռեժիսորի 26 երկրից և 5 մայրցամաքից: Նրանցից մեկն էլ Ատոմ Էգոյանն էր:

Իր սիրելի ֆիլմերից մեկի` իտալացի ռեիսոր Լուկինո Վիսկոնտիի «Սանդրա» ֆիլմի մասին Էգոյանը գրել է մի ամբողջ գիրք «Սիրելի Սանդրա» անունով:

1987 թվականին Մոնրեալի կինոփառատոնում գերմանացի նշանավոր ռեժիսոր Վիմ Վենդերսը «Երկինքը Բեռլինի վրա» ֆիլմի համար իրեն շնորհված 5000 ԱՄՆ դոլար մրցանակը փոխանցեց երիտասարդ ռեժիսոր Ատոմ Էգոյանին`այդպիսով իր հիացմունքն արտահայտելով ռեժիսորի վաղ շրջանի ֆիլմերի նկատմամբ։

Ատոմ Էգոյանի ֆիլմերն անընդհատ հայտնվում են առաջատար կինոփառատոների մրցույթային ծրագրերում` բազմիցս արժանանալով Տորոնտոյի, Մոսկվայի, Կաննի կինոփառատոնի մրցանակներին, իսկ «Լուսավոր Գալիքը», Կաննի կինոփառատոնի գրան պրիի արժանանալուց բացի, «Օսկարի» է առաջադրվել 2 անվանակարգում: