ԵՐԵՎԱՆ, 20 փետրվարի — Sputnik. Հանրաքվեի տարածքային հանձնաժողովներից ստացված տվյալների համաձայն` ժամը 14:00-ի դրությամբ Արցախի Հանրապետության Սահմանադրության նախագծի հանրաքվեին մասնակցել է 48 հազար 115 քաղաքացի, որը կազմում է ընդհանուր թվի 46,82 տոկոսը: Այս մասին տեղեկացնում է Արցախպրեսս-ը։
Այս տեղեկությունները հրապարակել է ԼՂՀ կենտրոնական ընտրական հանձնաժողովի փոխնախագահ Եղիշե Արզումանյանը:
Արզումանյանի խոսքով` ամենապասիվ ընտրատարածքը Երևանինն է: Այստեղ քվեարկությանը մասնակցել է 139 քաղաքացի կամ՝ ընտրողների 24.65 տոկոսը:
«Երևանում ընտրացուցակները կազմվել են՝ հաշվի առնելով Երևանում սովորող ուսանողներին, բայց նրանց որոշ մասը Արցախում արդեն քվեարկել է և ընտրացուցակից հանել են նրանց: Ինչ վերաբերում է թալիշցիներին, այնպես ենք կազմակերպել, որ բոլորը կարողանան մասնակցել: Կմասնակցեն, թե ոչ՝ իրենց խնդիրն է»,-ասել է Եղիշե Արզումանյանը։
Փետրվարի 20-ին Արցախում ընթանում է սահմանադրական հանրաքվե: Հանրաքվեն անցկացնելու համար ստեղծվել է 12 ընտրատարածք և 280 ընտրական տեղամասերում: Մասնակցելու իրավունք ունի 102 757 քաղաքացի:
