ԵՐԵՎԱՆ, 20 փետրվարի — Sputnik. ՀՀ վարչապետ Կարեն Կարապետյանն իր ֆեյսբուքյան էջում կոչ է արել բոլորին արևային վահանակներ տեղադրել։
«Կոչ եմ անում բոլորին տեղադրել արևային վահանակներ իրենց տներում և բիզնեսներում։ Մենք ստեղծել ենք այնպիսի պայմաններ, որ արևային էներգետիկայից չօգտվելն արդեն անտրամաբանական է։ Այս տարի կառավարությունն աշխատում է բազմաթիվ ուղղություններով, որպեսզի այս ոլորտում ունենանք աննախադեպ աճ»,- Ֆեյսբուք սոցիալական ցանցի իր էջում գրել է վարչապետը։
Արևային էներգաապահովմանն անցում կատարելու նախագիծը Հայաստանում մեծ թափ է հավաքում, ինչը դրական են գնահատում ոլորտի մասնագետները։ Մեծ Մասրիկում 50 ՄՎտ հզորությամբ արևային կայանի կառուցումը երկրի համար պատմական իրադարձություն է, և այն Հայաստանի արևային էներգետիկայի զարգացման առաջին փորձը կլինի։ Փորձնական ծրագրի հաջողությունից էլ կախված է ոլորտի ապագան և հաջորդ կայանների կառուցման հարցը։
