ԵՐԵՎԱՆ, 18 փետրվարի — Sputnik. Երեխաներն ու նրանց ծնողներն այսօր եկել էին Մանկապատանեկան գրքի երևանյան 13-րդ ցուցահանդես-տոնավաճառի բացմանը: Գրեթե բոլոր երեխաների ձեռքերում նոր գրքեր կային, ու փոքրիկները հետաքրքրությամբ ուսումնասիրում էինք դրանք:
Ավանդաբար անցկացվող ցուցահանդես-տոնավաճառի նպատակն է նոր լույս ընծայվող մանկապատանեկան գրքերը ներկայացնել հասարակությանը (հատկապես՝ պատանիներին) և զարգացնել ընթերցանությունը: Այս տարի ՀՀ սփյուռքի նախարարության հետ համագործակցության շրջանակում ներկայացված է8 նաև սփյուռքում հրատարակվող գրականությունը:
Ելույթ ունենալով 13-րդ ցուցահանդեսի բացմանը՝ սփյուռքի նախարար Հրանուշ Հակոբյանը նշեց, որ, ցավոք, այսօր հասարակությունը կորցրել է հետաքրքրությունը գրականության և գրքերի հանդեպ:
«Մենք դեռ դպրոցական նստարանից պետք է երեխաների մեջ սեր դաստիարակենք գրքերի հանդեպ: Տանը, մանկապարտեզում, դպրոցում պետք է ասել երեխաներին, որ գիրքը լավագույն ընկերն է, գիտելիքների աղբյուր: Ամենակարևորը՝ գիրքը մայրենի լեզուն ուսումնասիրելու գանձարան է», — ասաց նախարարը:
Հակոբյանը հավելեց, որ ՅՈՒՆԵՍԿՕ-ն փետրվարի 21-ը Մայրենի լեզվի միջազգային օր է հայտարարել, և Հայաստանը նույնպես կմիանա այդ տոնին:
«Ցանկանում եմ շնորհավորել բոլորիս այս հիանալի շաբաթվա առթիվ, քանի որ փետրվարի 19-ը՝ Հովհաննես Թումանյանի ծննդյան օրը, Գրողների միության հետ համատեղ որոշմամբ հռչակվել է որպես Գիրք նվիրելու օր: Յուրաքանչյուր հայի համար ամենակարևորը մայրենի լեզուն է: Ապրելով հայրենիքում և նրա սահմաններից դուրս՝ չպետք է մոռանալ այն մասին, որ պետք է սրբորեն պահպանել հայոց լեզուն: Մենք պետք է մեր լեզուն սերնդեսերունդ փոխանցենք դարերի միջով», — ասաց նախարարը:
Գիրք զինվորին
Հայաստանի մշակույթի նախարարի տեղակալ Ներսես Տեր-Վարդանյանն իր հերթին նշեց, որ 13 թիվը (նկատի ունի 13-րդ ցուցահանդես-տոնավաճառը՝ խմբ.) վկայում է, որ միջոցառումն ավանդական բնույթ է կրում, նշանակում է՝ լիովին կայացել է:
«Ես ուրախ եմ, որ մեր ավանդական գործընկերների հետ մեկտեղ մենք այս տարի նաև համագործակցում ենք սփյուռքի նախարարության հետ: Եվս մեկ ուրախալի լուր. Գիրք նվիրելու օրը յուրաքանչյուրը կարող է գիրք նվիրել զինվորներին: Այդ օրը կտեղադրվեն հատուկ արկղեր, որպեսզի ցանկացողները հնարավորություն ունենան բարի գործ կատարել», — ասաց Տեր-Վարդանյանը:
Նրա խոսքով՝ բոլոր նվիրված գրքերն ավելի ուշ կուղարկվեն Հայաստանի զորամասեր:
Ապագան կախված է ընթերցանությունից
Հայաստանի Ազգային ժողովի պատգամավոր Նաիրա Զոհրաբյանը նշեց, որ ինքն ու իր ընտանիքի անդամները բարձր են գնահատում այն, ինչ անում է Խնկո Ապոր անվան գրադարանը՝ ընթերցանության տարածման համար:
«Այս միջոցառումը շատ կարևոր է, քանի որ ցուցահանդեսը լուսավոր երևույթ կդառնա Հայաստանի համար այս բարդ օրերին: Այստեղ հավաքված բոլոր երեխաներն ապացուցում են, որ ապագայում մենք կվերադառնանք ընթերցանությանն ու գրականությանը», — ասաց պատգամավորը:
Ցուցահանդես-վաճառքին իրենց հրատարակած գրքերով մասնակցում են «Էդիթ Պրինտ», «Զանգակ», «Փրինթինֆո», «ՎՄՎ¬Պրինտ», «Արևիկ», «Մարի», «Ակտուալ արվեստ» հրատարակչությունները, «ՋԻ ԷՍ ԷՄ» ստուդիան, «Բուկինիստ» գրախանութը, «Գրքի և հրատարակչական գործի կենտրոն» ՊՈԱԿ-ը, ՀՀ սփյուռքի նախարարությունը, Հայաստանի գրողների միությունը, «IBBY Հայաստան» կազմակերպությունը և ԻԻՀ դեսպանության մշակույթի կենտրոնը:
Ցուցահանդես-վաճառքի շրջանակում որոշ հրատարակչություններ գրքերը վաճառում էին հատուկ զեղչերով:
