ԵՐԵՎԱՆ, 17 փետրվարի — Sputnik. ԵԱՀԿ ՄԽ համանախագահներ Իգոր Պոպովը (Ռուսաստան), Ստեֆան Վիսկոնտին (Ֆրանսիա) և Ռիչարդ Հոգլանդը (ԱՄՆ) հայտարարել են, որ չեն ընդունելու փետրվարի 20-ին ԼՂՀ նոր սահմանադրության նախագծի վերաբերյալ նշանակված հանրաքվեի արդյունքները։ Այս մասին գրված է ԵԱՀԿ հայտարարության մեջ։
Սահմանադրության հանրաքվեն Ղարաբաղում կանցկացվի փետրվարի 20-ին։ Նոր նախագծով նախատեսվում է կառավարման կիսանախագահական համակարգից անցում կատարել նախագահականի։ ԵԱՀԿ ՄԽ համանախագահներն ընդգծել են, որ «դե ֆակտո Լեռնային Ղարաբաղի իշխանությունները նման ընթացակարգի կիրառումը դիտարկում են որպես սեփական բնակչության հասարակական կյանքի կազմակերպման փորձ», սակայն «երկրներից ոչ մեկը, այդ թվում Հայաստանն ու Ադրբեջանը, չեն ճանաչում ԼՂՀ-ն որպես անկախ և ինքնիշխան պետություն»։
«Համապատասխանաբար համանախագահները չեն ընդունում փետրվարի 20-ին նախատեսված հանրաքվեի արդյունքները», — գրված է ԵԱՀԿ մամուլի հաղորդագրության մեջ։
Համանախագահներն ընդգծել են նաև, որ հանրաքվեի արդյունքները որևէ կերպ չեն կանխորոշում ԼՂՀ կարգավիճակը կամ ղարաբաղյան հակամարտության վերաբերյալ ընթացիկ բանակցությունների հանգուցալուծումը։ Նրանք պատրաստվում են տարածաշրջան այցելել մարտին։
Համանախագահները հանդիպում են ունեցել Հայաստանի և Ադրբեջանի արտգործնախարարներ Էդվարդ Նալբանդյանի և Էլմար Մամեդյարովի հետ։ Արտգործնախարարների հետ զրույցում համանախագահներն ընդգծել են հակամարտության լուծման համար համապարփակ բանակցությունները վերսկսելու անհրաժեշտությունը: Միևնույն ժամանակ նրանք նշել են, որ Հայաստանի իշխանությունների կողմից ադրբեջանցի զինծառայողի դին վերադարձնելու որոշումը մարդասիրական քայլ էր:
