ԵՐԵՎԱՆ, 17 փետրվարի — Sputnik. Ընտրողների էլեկտրոնային գրանցման մեխանիզմը, որը կներդրվի գալիք խորհրդարանական ընտրությունների ընթացքում, փորձարկել են Գեղարքունի մարզի Սեմյոնովկա գյուղի և Արմավիրի մարզի Վարդաշեն գյուղի տեղական ինքնակառավարման մարմինների ընտրություններում։ Հայաստանի կառավարության աշխատակազմի ղեկավար-նախարար Դավիթ Հարությունյանը լրագրողներին պատմեց քվեարկության ընթացքում նոր համակարգի կիրառման արդյունքների և բացահայտված թերությունների մասին։
Այսպես, կրկնակի քվեարկության ժամանակ վառվում է կարմիր լույս, եթե դեղին լույս է վառվում, նշանակում է` ընտրողը կապ չունի տվյալ ընտրատեղամասի հետ։ Դիտորդներն առաջարկել են լուսային ազդանշանի հետ մեկտեղ ավելացնել ձայնային ազդանշան։
Եթե ընտրողի անձնագիրը հին է և մաշված, սարքը չի ճանաչի այն։ Դրա հետ կապված` առաջարկել են մեծացնել էլեկտրոնային սարքերի կողմից տրվող կտրոնների տառատեսակը։ Հարությունյանը հավելեց, որ մարտի երկրորդ կեսին կսկսվի մասնագետների նախապատրաստում, որոնք կաշխատեն նոր տեխնիկական սարքերով։ Ենթադրվում է, որ ընտրատարածքներում, որտեղ գրանցված է մինչև 900 ընտրող, կտեղադրվի մեկական տեխնիկական սարք, այն ընտրատեղամասերում, որտեղ ընտրողների թիվը գերազանցում է 900-ը` երկուական։
Հայաստանում խորհրդարանական ընտրությունները տեղի կունենան ապրիլի 2-ին։
