Հայաստանի նկարիչների միությունում փետրվարի 17-ին բացվել է անվանի ռուսահայ երաժիշտ, նկարիչ և ռեժիսոր Ստաս Նամինի ցուցահանդեսը, որը կտևի մինչև փետրվարի 27-ը։ Ցուցահանդեսում ներկայացված է Նամինի շուրջ 80 նկար` գեղանկարչական և գրաֆիկական աշխատանքներ։
«Մաղթում եմ սեր և երջանկություն։ Այս կյանքում մնացած ամեն ինչը երկրորդական է, ամենագլխավոր դրանք են», — ասաց Նամինը Sputnik Արմենիայի թղթակցին։
Նա հավելեց, որ ապրիլի 24-ին Մոսկվայում կկայանա «Հայաստանի հին վանքերը» վավերագրական ֆիլմի ցուցադրությունը։ Նամինը վերջերս է ճանապարհորդել Հայաստանում և Ղարաբաղում։ Այդ ուղևորությունն էլ ոգեշնչել է նրա ֆիլմի ստեղծմանը։ Հայաստանի Նկարիչների միության նախագահ Կարեն Աղամյանը ցուցահանդեսի բացման ժամանակ հայտարարեց, որ այսուհետև Ստաս Նամինը միության պատվավոր անդամ է։ Ցուցահանդեսի բացմանը ներկա են գտնվել Հայաստանի առաջին տիկին Ռիտա Սարգսյանը և մշակույթի նախարար Արմեն Ամիրյանը։
