Ջորջիո Պետրոսյանը ծնվել է Հայաստանում, 14 տարեկանում ընտանիքով տեղափոխվել է Իտալիա։ Այժմ նա 31 տարեկան է։ Նա Glory World Series-ի գրանպրիի կրկնակի հաղթող է, ճանաչվել է աշխարհի լավագույն քիք-բռնցքամարտիկ՝ անկախ քաշային կարգից։ Կազմակերպիչները Ջորջիոյին նվիրեցին Ռուսաստանի նախագահ Վլադիմիր Պուտինի նկարով շապիկ։ Մարզումներից հետո նա պատասխանեց Sputnik Արմենիայի թղթակից Ալանա Սաբեևայի հարցերին։
-Ասացեք, խնդրում եմ, ի՞նչ է ձեզ համար այն 14 տարին, որ անցկացրել եք Հայաստանում։
Մանկությունս անցել է Հայաստանում։ Միշտ ժամանակս ընտանիքիս հետ եմ անցկացրել։ Ամենավառ տպավորությունս` հրաշալի Սևանա լճում լողալն էր։
-Ի՞նչ է ձեզ համար հայրենիքը։
Ծնվել եմ Հայաստանում, սակայն հետագա կյանքս անցել է Իտալիայում։ Ինձ համար դժվար է որևէ բան ասել, քանի որ այսօր Հայաստանն ինձ համար բոլորովին նոր երկիր է։
-Պահպանու՞մ եք հայկական ավանդույթները։
Այո, իհարկե, մենք պահպանում ենք մեր ավանդույթները։ Երկու ծնողներս էլ հայ են։
-Ինչի՞ մասին եք երազել մանկության տարիներին և այսօր։
Մանուկ ժամանակ երազել եմ լինել առաջինը, իսկ այսօր դժվարանում եմ պատասխանել։
-Պատկերացնու՞մ եք Ձեզ առանց քիք-բռնցքամարտի։
Դժվար է ինձ առանց դրա պատկերացնելը, քանի որ մանկուց միայն դրանով եմ զբաղվել և ինձ տեսել միայն սպորտում։
-Ինչպիսի՞ն է տրամադրությունը մենամարտից առաջ։ Ինչպե՞ս եք գնահատում ձեր մրցակցին։
Հիմա շատ հանգիստ եմ, տեսնենք, թե ինչ կլինի մրցումների օրը։ Կաշխատեմ առավելագույն կարողություններս ցույց տալ։ Արտյոմ Պաշպորինին վաղուց եմ ճանաչում, հարգում եմ նրան, ինչպես ցանկացած մրցակցի։ Նպատակս հաղթելն է։ Պատրաստ եմ, և դուք դա կտեսնեք։
-Ի՞նչ կմաղթեք ձեր հայրենակիցներին։
Կխնդրեի նրանց՝ երկրպագել ինձ, քանի որ տնից հեռու եմ գտնվում։
Պետրոյան-Պաշպորին մենամարտը տեղի կունենա փետրվարի 18-ին՝ շաբաթ օրը, Մոսկվայի «Դինամո» սպորտի պալատում։
