ԵՐԵՎԱՆ, 17 փետրվարի — Sputnik. Միջազգային հանրության կողմից Լեռնային Ղարաբաղի Հանրապետության անկախության ճանաչումը կամ Հայաստանի հետ նրա միավորման փաստի ընդունումը լիովին հնարավոր է միջազգային մեթոդներով, ասաց Հայաստանի ԱԳՆ նախկին ղեկավար, «Համախմբում» կուսակցության առաջնորդ Վարդան Օսկանյանը։
«Կարելի է հասնել միջազգային հանրության կողմից Լեռնային Ղարաբաղի ժողովրդի ազգային ինքնորոշման իրավունքի փաստի ճանաչմանը։ Ես տեսնում եմ այդ ուղին, կարծում եմ, որ կարելի է հանգել դրան։ Իմանալով ներկա գործընթացները, իմանալով միջազգային հանրության մոտեցումները` ճիշտ դիվանագիտության դեպքում կարելի է հասնել դրան», — ասաց Օսկանյանը։
Նրա խոսքով, եթե ընտրողներին նման հնարավորություն ընձեռվի, ապա նրանց դաշինքը («Օհանյան-Րաֆֆի-Օսկանյան») կարող է հասնել նման արդյունքի` ամենակարճ ճանապարհով։
Այդ հայտարարությունը Օսկանյանի, պաշտպանության նախկին նախարար Սեյրան Օհանյանի և «Ժառանգություն» կուսակցության նախագահ Րաֆֆի Հովհաննիսյանի դաշինքի հիմնական նախընտրական խոստումներից է։
Օսկանյանը նաև նշեց, որ Ղարաբաղում գալիք սահմանադրական փոփոխություններն արդարացված կլինեն, եթե դրանք չդառնան իշխանության վերարտադրության մեխանիզմ։
«Ես ուզում եմ, որպեսզի Լեռնային Ղարաբաղը հավատարիմ մնա իր ընտրած ժողովրդավարական ճանապարհին։ Ղարաբաղը հաճախ առաջ է եղել Հայաստանից, շատ ոլորտներում օրինակ է ծառայել մեզ համար, օրինակ, ընտրությունների հարցում», — ասաց Օսկանյանը։
Օսկանյանի խոսքով` ցավալի կլինի, եթե Ղարաբաղում սահմանադրական բարեփոխումը, ինչպես Հայաստանում, ծառայի ինչ-որ մեկի վերընտրմանը։
Սակայն Օսկանյանը դրական է վերաբերվում հիմնական օրենքի փոփոխությանը` նշելով, որ դա Ղարաբաղի բնակիչների ժողովրդավարական իրավունքն է։
