ՐԵՎԱՆ, 17 փետրվարի — Sputnik. Ադրբեջանական կայքերից մեկը «վերլուծական» հոդված է գրել Հայաստանում քաղաքական ապաստան ստացած Ադրբեջանի քաղաքացի, «Թոիլշի Սադո» թերթի լրագրող Շահին Միրզոևի մասին, որտեղ մեկ այլ ադրբեջանական կայքի վրա հղմամբ, նշում է, թե թալիշ գործիչն ամենևին էլ ազգությամբ թալիշ չէ, իսկ նրա նախնիները իբրև թե Երևանից տեղափոխվել են Իրան, իսկ հետո՝ ներկայիս Ադրբեջանական Հանրապետության տարածք: Այս մասին Sputnik Արմենիային հայտնեց իրանագետ Վարդան Ոսկանյանը։
«Երբ բացում ես հղման աղբյուրը, ապա այն նույնպես հիմնված է «հղման» վրա, բայց արդեն ֆեյսբուքյան ինչ-որ անհայտ օգտատիրոջ մեկ տողանոց տառասխալներով գրառման, ինչից պարզ է դառնում, որ «տեղեկատվության» սկզբնաղբյուրը հենց այս ակնհայտորեն շինծու նախադասությունն է»,- Ֆեյսբուք սոցիալական ցանցի իր էջում գրել է Ոսկանյանը:
Ըստ նրա` «տրամաբանությունը», ինչպես ցանկացած պարզունակ ապատեղեկատվության պարագայում, մեկն է՝ ընթերցողներից շատ քչերը կփնտրեն և կգտնեն հղման սկզբնաղբյուրը և հիմնականում կուլ կտան ակնհայտ ստահոդ քարոզչական խայծը:
Ոսկանյանի խոսքով` այդ առումով ուշագրավ է հենց Շահին Միրզոևի արձագանքն այս ապատեղեկատվությանը. «Եթե իմ նախնիները Երևանից են, ապա ես վերադարձել եմ հայրենիք, էլ ինչու՞ են իրենց պատռում»։
