ԵՐԵՎԱՆ, 17 փետրվարի — Sputnik. Վիգեն Հակոբյանի խոսքով` այս ընտրությունները տարբերվում են նրանով, որ անսովոր շատ թվով դաշինքներ են ներկայացված:
«Այս անգամ պայմանական ընդդիմադիր կամ, ավելի շուտ, ոչ իշխանական դաշտում ակնհայտ առաջնորդներ ու անձինք չկան, որոնց շուրջ հնարավոր կլիներ միասնական դաշինքներ ստեղծել: Ցավոք, այդ դաշինքներում ընդհանուր գաղափարախոսություն չկա… Նրանց հիմնականում միավորում է խորհրդարանում ինչ-որ կերպ հայտնվելու ձգտումը, ոչ թե գաղափարական բաղկացուցիչը: Այսինքն որոշ դաշինքներում կան կուսակցություններ, որոնց մի քանի ամիս առաջ միմյանց հետ պատկերացնելը դժվար էր», — ասաց քաղտեխնոլոգը:
Նա համոզված է, որ Հայաստանի Հանրապետական կուսակցությունը ընտրություններում հաղթելու մեծ հնարավորություններ ունի, սակայն դա չի նշանակում, որ նրանք կայուն մեծամասնություն կկազմեն:
Հակոբյանը կարծում է, որ երկրորդ տեղի համար մեծ շանսեր ունի Գագիկ Ծառուկյանի դաշինքը: Ըստ նրա՝ դա հայկական ֆենոմեն է՝ «օլիգարխ, որին աջակցում է բողոքող ընտրազանգվածը»:
