Sputnik Արմենիային տված հարցազրույցում ցուցահանդեսի մասին պատմեց ԳՄՌԿ մշակութային և հասարակական ծրագրերի բաժնի ղեկավար Իրինա Կասացկայան։ Զրուցել է Անի Լիպարիտյանը։
-Իրինա Ֆյոդորովնա, մանրամասներ կպատմե՞ք «75 տարի։ Պատմությունը սկսում է լուրերից» ցուցահանդեսի մասին։ Որքա՞ն է այն տևելու։
Հայաստանում Գիտության և մշակույթի ռուսական կենտրոնը ներկայացնում է Խորհրդային ինֆորմբյուրո գործակալության 75-ամյակին նվիրված «75 տարի։ Պատմությունը սկսում է լուրերից» շարքը։ Մենք գիտենք, որ Խորհրդային ինֆորմբյուրոն այնպիսի խոշոր հայրենական գործակալությունների նախահայրն է, ինչպիսիք ԱՊՆ-ը, ՌԻԱ Նովոստին, ՄՏԳ «Ռոսիա Սեգոդնյան»։
Մենք ցուցադրում ենք Խորհրդային ինֆորմբյուրոյի գոյության չորս դարաշրջանները ներկայացնող 50 լուսանկար, որոնք պատմում են ինչպես համաշխարհային պատմության մեջ, այնպես էլ մշակութային, սպորտային և քաղաքական կյանքում տեղի ունեցող իրադարձությունների մասին։
Ցուցահանդեսին ներկայացված են տարբեր մրցույթների հաղթողների աշխատանքներ, այդ թվում նաև միջազգային, ինչպես նաև նախկինում ոչ մի տեղ չհրապարակված լուսանկարներ։
-Բոլոր լուսանկարները բացառի՞կ են։ Ո՞ր ժամանակաշրջանն են դրանք ընդգրկում։
Ոչ բոլորը։ Կան լուսանկարներ, որոնք վերցրած են ՌԻԱ Նովոստիի արխիվից։ Միանգամից հարկ է նշել, որ դրանք բնօրինակները չեն, այլ լուսանկարներ, որոնք հատուկ ցուցահանդեսի համար են արվել։ Լուսանկարներում կարելի է տեսնել տարբեր քաղաքական գործիչների, ինչպես նաև այնպիսի անձանց, ում մասին կարելի է տեղեկանալ պատմությունից։
Այստեղ ներկայացված են 1936 թվականից մինչ օրս արված աշխատանքներ։
-Հիմնականում, լուսանկարներում պատմական փաստե՞ր են։
Այո։ Սա մեր ոչ հեռու և հեռավոր անցյալն է։ Այցելուները հնարավորություն կունենան մեկ ամսվա ընթացքում տեսնելու ԳՄՌԿ-ում ներկայացված բոլոր 50 լուսանկարները։ Ինչպես նաև նրանք հնարավորություն ունեն ծանոթանալ այն նկարիչների հետ, որոնք այսօրվա դրությամբ մեծ պարգևների են արժանացել Ռուսաստանում և նրա սահմաններից դուրս։
Օրինակ, ներկայացվել են «Фронтовая иллюстрация» թերթի լուսանկարիչ Անատոլի Գարանինի «Զինվորի մահը» աշխատանքը։ Նրա արված լուսանկարը համալրեց դասական ստեղծագործությունների ռազմաճակատային ֆոտոռեպորտաժների շարքը։
