ԵՐԵՎԱՆ, 14 փետրվարի — Sputnik. Ադրբեջանում մարդու իրավունքների խախտումը պետական քաղաքականության մաս է կազմում, լրագրողներին հայտնեց Հայաստանի պաշտպանության նախարար Վիգեն Սարգսյանը։
«Սա ևս մեկ վկայություն է, որ հարևան Ադրբեջանում մարդու իրավունքների խախտումը, խտրականությունները, ոչ մարդկային վերաբերմունքը, մասնավորապես, ազգային փոքրամասնությունների նկատմամբ, շարունակում են մնալ պետական քաղաքականության սկզբունքներում», — ասաց Սարգսյանը։
Նրա խոսքով` Միրզոևի դիմումը ուսումնասիրվել է և որևէ հիմք չկա այն մերժելու համար։ Սարգսյանը նշեց, որ միջազգային կազմակերպությունների հետ համատեղ կարվի հնարավոր ամեն ինչ այդ մարդու օրինական իրավունքները պաշտպանելու և նրան մշտական ապաստան գտնելու համար։
Ադրբեջանի քաղաքացի Շահին Միրզոևը Հայաստանից ապաստարան է խնդրել՝ լքելով հայրենի Ադրբեջանը: Շահին Միրզոևը Թալիշական մշակույթի խորհրդի անդամ է, Թալիշական ազատագրական շարժման մասնակից, «Թոլիշի Սադո» թերթի թղթակից։ Նա ստիպված է եղել փախչել Ադրբեջանից՝ ազգային և կրոնական փոքրամասնությունների հանդեպ բռնաճնշումների ու նրանց իրավունքների կոպտագույն ոտնահարումների պատճառով, և ընտանիքով ժամանել Հայաստան։ Հայաստանի իշխանությունները դրական են արձագանքել Շահին Միրզոևի խնդրանքին։
