ԵՐԵՎԱՆ, 13 փետրվարի — Sputnik. Ստամբուլի հայտնի «Ռեինա» ժամանցի վայրում ահաբեկչություն իրականացրած ուզբեկ Աբդուլգադիր Մաշարիպովը հարցաքննություններից մեկի ժամանակ հայտարարել է, որ ահաբեկչական հարձակումն իրականացրել է քրիստոնյաներից վրեժ լուծելու համար: Այս մասին գրում է թուրքական «Բիրգյուն» պարբերականը:
Մաշարիպովը նաև նշել է, որ մինչ այդ որևէ ահաբեկչական գործողության չի մասնակցել: Նա հայտարարել է, որ «Ռեինա» ակումբ է մտել որպես մահապարտ և խնդրել է իրեն դատապարտեն մահապատժի:
Ավելի վաղ Ստամբուլի նահանգապետ Վասիպ Շահինը հայտարարել էր, որ Մաշարիպովը պատրաստություն է անցել Աֆղանստանի ահաբեկչական ճամբարներում, տիրապետում է 4 լեզվի, իսկ Թուրքիա է ներթափանցել անօրինական ճանապարհով, Իրանի տարածքով՝ 2016թ.-ի հունվարին:
