ԵՐԵՎԱՆ, 12 փետրվարի — Sputnik. Հայաստանի հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանին ներառել են «ՖԻՖԱ» թիմում, գրում է Սպորտ-Էքսպրես հրատարակությունը:
Լավագույնների կազմը որոշվում է այս շրջանում ֆուտբոլիստների իրական ձեռքբերումների հիման վրա:
«Կարմիր սատանաների» հայ կիսապաշտպանը «Լեսթերի» հետ խաղից հետո (3:0) արժանացել է թիմի գլխավոր մարզիչ Ժոզե Մոուրինյոյի գովասանքին.
«Հիմա ես տեսնում եմ Հենրիխի կախարդանքը: Բայց ես տեսնում եմ նաև այլ բաներ, որոնք ցանկանում էի տեսնել: Մխին շատ լավ է խաղում»:
Մխիթարյանն այդ խաղում գեղեցիկ գոլի և արդյունավետ գոլային փոխանցման հեղինակ է դարձել:
«Միկին անհավանական գոլ է խփել: Նա կարող էր մի քանի գնդակ էլ խփել; Հենրիխի համար կարևոր էր աչքի ընկնելը: Իբրահիմովիչը շատ գոլեր է խփում, բայց մենք նույնպես պետք է գրավենք մրցակցի դարպասը»,- մեջբերում է հրատարակությունը Մխիթարյանի ակումբակից Խուան Մատայի խոսքերը:
Մխիթարյանի հաջողությանն անդրադարձել է նաև Ռուսաստանում հայտնի շոումեն Գարիկ Մարտիրոսյանը. «Շատ եմ ուրախանում, երբ նա հաղթում է: Նա մեր հայկական սպորտի հերոսն է և օրինակ է ծառայում մեզ համար»:
