ԵՐԵՎԱՆ, 11 փետրվարի-Sputnik. Պաշտպանության նախարար Վիգեն Սարգսյանը լրագրողների հետ զրույցում նախ շեշտեց, որ հայկական կողմը երբեք գաղտնի չի պահում սահմանին տիրող իրավիճակը:
«Ամեն անգամ, երբ լինում են զինադադարի խախտումներ, շատ պարզ դրանց մասին խոսում ենք՝ նշելով խախտումների քանակը և կիրառված միջոցները: Բոլորը պետք է վստահ լինեն, որ մեր զինված ուժերը լիովին վերահսկում են իրավիճակը շփման գծում և որևէ մեկը չպետք է մտածի, որ այդ խախտումներ կարող են հուսահատեցնել կամ լարումը հասցնել այն աստիճանի, որ մենք երկնչենք մեր գործը կատարելիս»,-ասաց նախարարը:
Վիգեն Սարգսյանը տեղեկացրեց, որ երեկ՝ փետրվարի 10-ին, այցելել է Տավուշի մարզ, հանդիպել բոլոր համայքների ղեկավարներին, գնացել լավագույն զորամաս ճանաչված Նոյեմբերյանի գունդ:
«Պետք է ասեմ, որ մեծ ոգևորություն և մեծ հպարտություն էի զգում՝ շփվելով սահմանին ապրող մեր հայրենակիցների հետ, որոնք իրականում սահմանապահ են: Շփեցի մեր զինվորների հետ, որոնք, անկախության տարիներին ծնված լինելով, փայլում են իրենց ոգով ու համոզվածությամբ, և վստահ են, որ այն ինչ կատարում են, անհրաժեշտ գործ է»,-ասաց Վիգեն Սարգսյանը:
Պաշտպանության նախարարը բոլորին հորդորեց տուրք չտալ այս ու այն կողմից հնչող տեղեկություններին և առաջնորդվել Պաշտպանության բանակի և ՀՀ ՊՆ տարածած հաղորդագրություններով:
