ԵՐԵՎԱՆ, 9 փետրվարի — Sputnik. 118-րդ քիմիական տարրին այն բացահայտած Յուրի Հովհաննիսյանի պատվին «Օգանեսոն» անունը շնորհելու հանդիսավոր արարողությունը տեղի կունենա սույն թվականի մարտին։ Այդ մասին ՌԻԱ Նովոստիին տված հարցազրույցում հայտնեց անձամբ գիտնականը։
Ռուսական գիտության պատմության մեջ կարևորագույն իրադարձություններից մեկը դարձավ 2016 թվականին 118-րդ քիմիական տարրին «օգանեսոն» անվանում շնորհելը։ Այն դրվել էր ի պատիվ տարրը բացահայտած գերծանր տարրերի սինթեզի բնագավառում համաշխարհային ճանաչում ունեցող ակադեմիկոս, Միջուկային հետազոտությունների միացյալ ինստիտուտի Գ. Ֆլյորովի անվան միջուկային ռեակցիաների լաբորատորիայի գիտական ղեկավար Յուրի Հովհաննիսյանի։
Հովհաննիսյանի կարծիքով, հիմնական միջոցառումը տեղի կունենա մարտի 2-ին Մոսկվայում` Ռուսաստանի գիտությունների ակադեմիայի գիտնականների կենտրոնական տանը։
«Տեղի կունենա, այսպես կոչված՝ նոր տարրի, երդմնակալության արարողությունը։ Ավանդույթի համաձայն, այն իրականացվում է միշտ, երբ նոր տարրին նորածնի պես անուն են շնորհում»,- ասել է ակադեմիկոսը։
Նա նշել է, որ 115-րդ և 118-րդ տարրերի «երդմնակալությանը» հրավիրված կլինեն մոսկովյան շրջանի մարզպետներ, մաքուր և կիրառական ֆիզիկայի միջազգային միության ու մաքուր և կիրառական քիմիայի միջազգային միության նախագահներ, ԱՄՆ-ի էներգետիկայի նախարարության միջուկային ֆիզիկայի բաժնի ղեկավարը, ԱՄՆ-ի Օքրիջի և Լիվերմորսկի ազգային լաբորատորիաների տնօրեններ, ԱՄՆ, Գերմանիայի, Ճապոնիայի և Ֆրանսիայի առաջատար գիտնականներ։
«Ես նոր եմ վերադարձել ԱՄՆ-ից, որտեղ անցկացվում էր 117-րդ` թեննեսին տարրի «երդմնակալությունը», տարրն անվանել էին Թեննեսի նահանգի անունով։ Սա ամերիկյան գործընկերների հետ մեր համատեղ տարրերից մեկն է։ Մարտի 14-ին ես հրավիրված եմ Տոկիո, որտեղ անցկացվելու է Ճապոնիայի պատվին իր անունը ստացած 133-րդ տարրի անվանակոչումը»,- ասել է Հովհաննիսյանը։
Ակադեմիկոսը նաև շնորհակալություն է հայտնել գործընկերներին՝ իր աշխատանքը նման բարձր գնահատականի արժանացնելու համար։
