ԵՐԵՎԱՆ, 8 փետրվարի — Sputnik. Այսօր Ազգային ժողովում կայացավ ՍԻՄ կուսակցության նախագահ, ԱԺ ՀՀԿ խմբակցության պատգամավոր Հայկ Բաբուխանյանի «Հայ-թուրքական փոխհարաբերությունները և ինֆորմացիոն պատերազմը (1991-2016թթ.)» վերնագրով գրքի շնորհանդեսը:
Գիրքը նվիրված է Հայաստանի անկախության 25-ամյակին և իր մեջ ամփոփում է այդ 25 տարիների ընթացքում Հայաստանի և Թուրքիայի փոխհարաբերություններն ու միտումները:
«Աշխատությունը կրում է աշխարհաքաղաքական և աշխարհատնտեսական բնույթ, կա լրագրողական աշխատանք, պատմական էքսկուրս։ Ես ութ տարի աշխատել եմ այս գրքի վրա»,- ասաց Բաբուխանյանը։
«Չէի ասի, որ ներկայացնում եմ վերջին ճշմարտությունը, բայց կարծում եմ գրքում արտահայտված մտքերը քննարկման արժանի են, և ես պատրաստ կլինեմ քննարկել ցանկացած առաջարկություն և դիտողություն»,- ընդգծեց պատգամավորը։
Գրքում հատուկ ուշադրություն է դարձված Թուրքիայի ցեղասպանաստեղծ գործունեությանն ու նկարագրին, վերլուծվել է նաև Թուրքիայի արտաքին քաղաքականությունն ու զարգացումները։
Ուշադրություն է դարձվել նաև հայ-թուրքական հարաբերությունների վերաբերյալ մամուլի հրապարակումներին։
