ԵՐԵՎԱՆ, 8 փետրվարի — Sputnik. Հայաստանը պահպանում է պետգնումների նկատմամբ իր պարտավորությունների ժամանակավոր սահմանափակման հնարավորությունը, որոնք ձեռք է բերել ԵՏՄ պայմանագրի շրջանակներում, Sputnik Արմենիային ասաց Զարգացման եվրասիական բանկի ինտեգրացիոն ուսումնասիրությունների կենտրոնի տնօրեն Եվգենի Վինոկուրը։
Նրա խոսքով` ԵՏՄ պայմանագրով ապրանքների ու ծառայությունների գնման բնագավառում արտոնություն է նախատեսված միության անդամ-երկրների համար։ ԵՏՄ երկրների և ազգային մատակարարներին հավասար իրավունքներ են տրվում։
«Սակայն ԵՏՄ անդամ-երկրները սեփական պարտականությունների սահմանափակման որոշակի գործիքներ ունեն։ Մասնավորապես, պետգնումների վերաբերյալ ԵՏՄ պայմանագրով (հավելված №25) նախատեսված է երկու տարի ժամկետով սահմանափակել արտոնյալ պայմանով գնումների մասնակցելը։ Բոլոր վեճերը նման դեպքերում կարգավորում է հանձնաժողովը»,- ասաց Վինոկուրովը։
Նա նշել է, որ ԵՏՄ երկրների պետգնումների ծավալը համադրելի է ԵՄ-ում ԵՏՄ երկրներից արտահանման ընդհանուր ծավալների հետ` շուրջ 270 մլրդ դոլար և 300 մլրդ դոլար։
Թեև ԵՏՄ-ում արդեն գոյություն ունի պետգնումների ընդհանուր շուկա, սակայն այնտեղ արդյունավետ աշխատելու հնարավորությունը միշտ չէ, որ հասանելի է փոքր և միջին բիզնեսին։ Սա, փորձագետի կարծիքով, ընդհանուր խնդիր է։
«Նախատեսվում էր, որ 2016 թվականին ԵՏՄ երկրների ձեռներեցները հնարավորություն կստանային մասնակցել պետգնումների միասնական համակարգում՝ էլեկտրոնային աճուրդների շնորհիվ։ Տվյալ համակարգը կոչված է պայմաններ ապահովել, որ ասենք՝ Երևանում գտնվելու ժամանակ ձեռներեցը կարողանա մասնակցել Ռուսաստանում կամ Ղազախստանում էլեկտրոնային աճուրդներին ու պայմանագրեր կնքել։ Նման հարթակներ կան արդեն, սակայն կան նաև մի շարք կարևոր տեխնիկական հարցեր»,- ասաց Վինոկուրովը։
Դրանց թվում, նրա կարծիքով, ԵՏՄ երկրների միջև էլեկտրոնային թվային ստորագրությունների ունիֆիկացիան է, ինչպես նաև պետգնումներին մասնակցելու հնարավորություն ունեցող մատակարարների և ապրանքների ռեեստրի ձևավորումը։
Ֆինանսների նախարար Վարդան Արամյանը օրերս հայտնել է, որ Հայաստանի կառավարությունը մտադիր է վերանայել ԵՏՄ երկրներից ապրանքների նկատմամբ պետգնումների համակարգում գործող առավելությունները։
