Հայաստանի պետական երիտասարդական նվագախմբի գեղարվեստական ղեկավար Սերգեյ Սմբատյանը ասաց, որ շատ է սպասում Ռուսաստանի Ազգային ֆիլհարմոնիկ նվագախմբի հետ հանդիպմանը, որի դիրիժորն է լինելու փետրվարի 8-ին, ինչպես նաև պատմեց Երիտասարդական նվագախմբի ծրագրերի մասին: Զրուցեց Անի Լիպարիտյանը:
- Սերգեյ, փետրվարի 8-ին դուք ղեկավարելու եք Ռուսաստանի Ազգային ֆիլհարմոնիկ նվագախումբը (գեղարվեստական ղեկավար՝ Վլադիմիր Սպիվակով): Հե՞շտ է աշխատել նման ճանաչված նվագախմբի հետ:
Դիրիժորի համար այդ հարցը հռետորական է: Այն կարելի է երկար քննարկել, բայց երբ կա շփման մեկ պրոֆեսիոնալ լեզու՝ երաժշտությունը և գաղափարախոսությունը, այդ ժամանակ հասկանում ես, թե որն է դիրիժորի աշխատանքի էությունը: Թեև բարդ է ղեկավարել կոլեկտիվը, որի ղեկավարն է մաեստրո Սպիվակովը:
Խաղացանկում ռուսական երաժշտություն է. Ռիմսկի-Կորսակովի «Շահերեզադեն», Ռախմանինովի «Մեռյալների կղզին» և Երկրորդ կոնցերտը, կնվագակցի հայտնի դաշնակահարուհի Եկատերինա Մեչետինան:
Ամեն անգամ նոր նվագախմբի հետ աշխատելը դիրիժորի համար անհայտ տարածք է: Ես սրտատրոփ սպասում եմ հանդիպմանը: Այն Ռուսաստանի լավագույն նվագախմբերից է, իմ առաջին համերգն է Մոսկվայում՝ այդ հայտնի նվագախմբի հետ: Հուսով եմ, որ մենք կքննարկենք ապագայի ծրագրերը, և համագործակցությունը կշարունակվի:
- Առաջիկայում ի՞նչ նվագախմբերի հետ եք նախատեսում համագործակցել:
2017թ-ին ես շատ համերգներ ունեմ Գերմանիայում, ապրիլին Վուպեւթալում տեղի է ունենալու իմ դեբյուտը Մյունխենի սիմֆոնիկ նվագախմբի հետ: Ծրագրերը և համերգները շատ են: Նախատեսվում են ելույթներ Լատինական Ամերիկայում:
Իմ արտասահմանյան ուղևորությունները նպաստում են, որպեսզի մարդիկ իմանան, որ Հայաստանում կան երաժշտաական լավ ավանդույթներ: Մենք կարողանում ենք աշխատել թիմում, ունենք անհատականություններ, որոնք կարող են ստեղծել կոլեկտիվներ:
Միաժամանակ, երբ Հայաստանից դիրիժոր են հրավիրում՝ արտասահմանյան կոլեկտիվի հետ ելույթ ունենալու համար, իսկ մինչ այդ ես հանդես չեմ եկել Մյունխենի նվագախմբի հետ, հասկանում ես, որ քեզնից ինչ-որ բան են ակնկալում: Հարց է ծագում, թե ինչ են սպասում նվագախմբի երաժիշտները և նրանց տնօրենը հայ դիրիժորից, որը լինելու է, օրինակ, Շումանի №4 սիմֆոնիայի դիրիժորը:
- Առաջիկայում ի՞նչ արտասահմանյան ելույթներ են սպասվում Երիտասարդական նվագախմբին և ինչպիսի՞ խաղացանկով է ուրախացնելու նվագախումբն այս տարի:
Այժմ բանակցություններ են ընթանում: Մարտի վերջին և ապրիլի սկզբին Հայաստանից դուրս վեց համերգի հրավեր կա հայտնի մենակատարների հետ: Դա խոսում է նվագախմբի որակի մասին: Երբ համաշխարհային աստղերը պատրաստ են ելույթ ունենալ Հայաստանի նվագախմբի հետ, ես դա համարում եմ մեր մեծ հաղթանակը:
Նվագախմբին հրավիրել են Արամ Խաչատրյանի ստեղծագործություններով մասնակցել Վարշավայում կայանալիք Բեթհովենի անվան զատկի փառատոնին: Մենք փորձում ենք մեր արտասահմանյան համերգների ընթացքում ներկայացնել հայկական երաժշտություն, դա հետաքրքիր է և նվագախմբի երաժիշտների դիրքորոշումն է:
