ԵՐԵՎԱՆ 4 փետրվարի-Sputnik. Հարութ Սեֆիլյանը Սիրիայից Հայաստան է եկել մոտ 5 տարի առաջ: Խոստովանեց՝ վերջերս պարբերաբար մտածում էր Հայաստանը թողնելու և Եվրոպայում կամ Կանադայում բնակություն հաստատելու մասին: Բայց վերջերս իր սրտով աշխատանքի առաջարկ ստացավ ու հասկացավ՝ Հայաստանից լավ տեղ չկա:
«Ռիբոկ» սպորտային ակումբում նա աշխատելու է որպես մենեջեր: Դեռ գործը չսկսած՝ ամեն օր գալիս է կիսակառույց շենք ու ծրագրեր մշակում՝ ինչպես անի, որ իր օրինակով հաճախորդները ևս իրենց զգան ինչպես տանը, որտեղ ժամանակը կայծակի արագությամբ կթռչի:
«Չեմ զգում` ժամանակն ինչպես է անցնում, կարծում եմ՝ այդպես է լինելու նաև ինձ մոտ մարզվողների համար: Նկատել եմ, որ հայ երիտասարդներն ավելի շատ են հետևում իրենց առողջ ապրելակերպին: Խորհուրդ կտամ լավ մարզվելու հետ նաև ճիշտ սնվեն, կարգապահ լինեն ու մարզական գիտելիքներն ավելացնեն»,- ասաց նա:
Հայաստանը Միացյալ Թագավորությունից, Իսպանիայից, Բրազիլիայից և ԱՄՆ-ից հետո կդառնա 5-րդ երկիրը, որտեղ գործում է «Ռիբոկ» սպորտային ակումբը:
Սպորտային ակումբը գտնվում է Դավթաշենում, 15 հազար քմ տարածք է զբաղեցնում: Ակումբի կառուցման աշխատանքներում ներգրավված է եղել 300 մասնագետ: Նոր հաստատության շնորհիվ մոտ 200 նոր աշխատատեղ կստեղծվի, իսկ մինչև 2020 թվականը նախատեսվում է այդ թիվն ավելացնել:
«Սպորտային ակումբը կարող է տարեկան 15 հազար մշտական հաճախորդի սպասարկել, իսկ գները մրցունակ կլինեն շուկայում: Մարդիկ կկարողանան սովորել սերֆինգով զբաղվել, ինչը եզակի է Հայաստանում: Մեր պայմանագիրը թույլ կտա այստեղ անցկացնել աշխարհի և Եվրոպայի առաջնություններ, երբ Հայաստան կժամանեն լավագույն սերֆինգիստները»,-ասաց «Ռիբոկ» սպորտային ակումբի գործադիր տնօրեն Արմենուհի Գևորգյանը:
Այս պահին ընթանում են ներքին հարդարման աշխատանքներ: Սպորտային ակումբը կբացվի ապրիլի կեսերին:
Նախագահ Սերժ Սարգսյանն այցելեց նորակառույց համալիր, ծանոթացավ առաջարկվող պայմաններին ու ծառայություններին:
Ակումբում կա 50 մ երկարությամբ օլիմպիական լողավազան՝ ջրացատկի աշտարակներով, վերականգնողական մարզման կենտրոն, ֆիթնես կենտրոն, մանկական լողավազան և այլ ծառայություններ:
