ԵՐԵՎԱՆ, 4 փետրվարի-Sputnik. Պետական գնումների էլեկտրոնային համակարգի արդիականացման արդյունքում ներդրված նոր սկզբունքները կարգելեն միմյանց հետ փոխկապակցված ընկերություններին մրցույթի մասնակցության հայտ ներկայացնել։ Բացի այդ, մրցութային հանձնաժողովի անդամների համար մրցույթի մասնակիցների ցանկը մինչև վերջ գաղտնի է պահվում։
«Փորձել ենք հավասարության դաշտ ստեղծել բոլոր մասնակիցների համար Մրցույթ կառավարելու հնարավորություն պատվիրատուն չի ունենալու»,- ոլորտի բարեփոխումներին նվիրված ԶԼՄ-ների ներկայացուցիչների հետ աշխատանքային քննարկմանը նշեց ՀՀ ՖՆ Պետական ներքին ֆինանսական հսկողության և պետական գնումների մեթոդաբանության վարչության պետ Սերգեյ Շահնազարյանը։
Գնումների էլէկտրոնային համակարգը Հայաստանում ներդրվել է 2012թ-ից, բայց պետական գնումների զգալի հատվածն այս տարիների ընթացքում իրականացվել է դրանից դուրս՝ օրենքով նախատեսված այլ ընթացակարգերով, ինչն էլ, պատասխանատուների համոզմամբ, կոռուպցիոն ռիսկեր է ստեղծել։
Բարեփոխումների հեղինակների կանխատեսմամբ, նոր համակարգը թույլ կտա 2017թ-ի ընթացքում գնումների գրեթե 90-100%-ն իրականացնել հատկապես էլեկտրոնային համակարգի միջոցով։ 2016 թ-ի վերջին ԱԺ-ի ընդունած գնումների մասին նոր օրենքն ուժի մեջ կմտնի ս.թ. ապրիլի 25-ին։
Նոր օրենքը, բացի կոռուպցիոն ռիսկերը նվազեցնող փոփոխությոունները, նաև որոշակի պարզեցումներ է նախատեսում տնտեսվարողների համար։ Մասնավորպես, ֆինանսների նախարար Վարդան Արամյանի խոսքով, վերացվել են անհարկի պահանջները։
«Որքան ձևական պահանջները շատ են լինում, կոռուպցիոն ռիսկերն այնքան մեծանում են»,- ասաց Վարդան Արամյանը։- «Ինչքան համակարգը բարդ ես պահում, այնքան կոռուպցիոն ռիսկերի հավանականությունը բարձրանում է»։
Նախարարի բնորոշմամբ՝ կատարված փոփոխութոյունները շատ համարձակ քայլ են։
