Մինչև հուլիս կառավարությունն արգելել է տեսչական ստուգումները: Այս որոշման հետևանքով Լեզվի պետական տեսչությունը ստիպված է բավարարվել միայն դիտարկումներ կատարելով: Տեսչության պետ Սերգո Երիցյանը Sputnik Արմենիա ռադիոկայանին հայտնել է, որ 2016թ-ի ընթացքում կատարված ավելի քան 500 դիտարկումների ընթացքում հայտնաբերվել է 250-270 խախտում:
«Բայց կոպտագույն խախտումներն ավելի քիչ են, երբ որ հայերեն ոչինչ գրված չէ: Օրենքն ասում է` եթե գրվածը ձախից աջ է, ուրեմն հայերենը պետք է լինի ձախ կողմում, իսկ շարունակությունը կարող է լինել արդեն օտար լեզվով, եթե վերից վար է, ապա հայերենը պետք է լինի վերևում»,- ասել է Երիցյանը:
Հայտնաբերված խախտումների պատասխանատուներին պատժելու իրավունք տեսչությունը, սակայն, այս պահին չունի: Մնում է միայն տեղեկացնել խախտման մասին, հորդորել վերացնել այն և ապավինել սեփականատերերի բարի կամքին:
