ԵՐԵՎԱՆ, 3 փետրվարի — Sputnik. Վարորդներն ավելի զուսպ ու զգույշ են սկսել վարել, Sputnik Արմենիային տված հարցազրույցում ասաց «Մադաթյան» հոգեբանական կենտրոնի ղեկավար Միհրդատ Մադաթյանը։
«Աքիլես» ավտովարորդների իրավունքների պաշտպանության կենտրոն ՀԿ-ի տվյալներով` 2016 թվականին 3203 ՃՏՊ է գրանցվել, իսկ 2015 թվականին 196 դեպքով ավել` 3399, ընդ որում 2016 թվականին տուժել է 4451 մարդ, 2015 թվականին` 4738 մարդ։ 2016 թվականին ՃՏՊ-ի հետևանքով 267 մարդ զոհվել է, իսկ 2015 թվականին`346-ը։ Տուժած հետիոտների թիվը 2016 թվականին 94-ն է, իսկ 2015 թվականին` 74 —ը։
Sputnik Արմենիայի խնդրանքով Միհրդատ Մադաթյանը խոսել է ՃՏՊ-ների պատճառով զոհերի և տուժած անձանց քանակի նվազման պատճառների մասին։
«Հայաստանում վարելու մշակույթը փոխվեց պարտադրանքի միջոցով։ Բայց որոշ հետիոտների վարքագծում ոչինչ չի փոխվել, քանի որ նրանց նկատմամբ պատժամիջոցներ չեն կիրառվում։ Վարորդների պարագայում իրավիճակը փոխվեց տեսախցիկների, արագաչափերի տեղադրման, տուգանքների և ճանապարհային ոստիկանության աշխատակիցների քաղաքականության փոփոխման հետ», — ասաց Մադաթյանը։
Ինչպես նշեց հոգեբանը` պետք չէ մոռանալ, որ կան նաև վարորդներ, որոնց համար ավտոմեքենա վարելը ինքնադրսևորման միջոց է։ Կան բարդույթներ ունեցող մարդիկ, դա խախտումներով վարելու պատճառ է դառնում։
«Այսօր ավտոմեքենան վարորդի համար, ինչպես միջնադարում` ձին։ Լավ ասպետներն ու որսորդները լավ ձի ունեին։ Այսօր լավ ավտոմեքենան ինքնադրսևորման կամ կյանքի նկատմամբ ագրեսիայի արտահայտման ձև է, ոմանք առաջնորդվում են «ունեմ, կարող եմ» կարգախոսով», — պարզաբանեց Մադաթյանը։
Հոգեբանի խոսքով` գոյություն ունի նաև երկրորդ գործոնը` ավտոմեքենայում վարորդը, կարծես, իր ափսեի մեջ լինի։ Նրան ոչ ոք չի տեսնում, և նա կարող է զգացմունքներին և գործողություններին ազատություն տալ, այն դեպքում, երբ նույնն անել չի կարող իրական կյանքում։
«Օրինակ բերեմ. տանը մարդը չի կարող ինքնադրսևորվել, կինն ավելի ուժեղ է, զոքանչը անդադար գոռում է, հետո տղամարդը նստում է ղեկին և դանդաղ քշում երրորդ գծով, որպեսզի մյուս տղամարդիկ ընթանան նրա հետևից։ Նման պահվածքը վտանգավոր է», — ասաց մեր զրուցակիցը։
Մադաթյանն ավելացրեց, որ բացի դրանից վարելու միջոցով որոշ վարորդների մոտ եսակենտրոն վարքագիծն է արտահայտվում։ Սա նշանակում է, որ կան վարորդներ, որոնք չեն մտածում ուրիշների մասին և վարում այնպես, ինչպես հարմար է իրենց։
Անկախ խառնվածքից, բնավորությունից և շատ հայ վարորդների վարքի առանձնահատկություններից, հոգեբանի կարծիքով, ՃՏՊ-ների, զոհերի և տուժածների քանակը կրճատվել է, քանի որ սկսել են նոր օրենքներ գործել։
