ԵՐԵՎԱՆ, 3 փետրվարի — Sputnik. ՀՀ ԱՆ աշխատակազմի բժշկական օգնության քաղաքականության վարչության պետ Ծաղիկ Վարդանյանի խոսքով` քաղցկեղով հիվանդացության և մահացության դեպքերը Հայաստանում կազմում են 21,9 տոկոս։
Քաղցկեղը ոչ վարակիչ հիվանդությունների մասով երկրորդ տեղում է։
«Հայաստանում վերջին 10 տարում քաղցկեղից հիվանդացության ցուցանիշն աճել է 1.8, մահացության ցուցանիշը` 1.9 տոկոսով»,- նշեց Վարդանյանը։
Նրա խոսքով` ներկայում ուռուցքային տարբեր հիվանդություն ունեցող 41 հազար հիվանդները գտնվում են դիսպանսեր հսկողության տակ:
2016 թվականին Հայաստանում հայտնաբերվել է ուռուցքային տարբեր հիվանդություններով 8400 նոր դեպք: Սա մի փոքր շատ է 2015թ. ցուցանիշից:
Հայաստանում արական սեռի մոտ առավել հաճախ գրանցվում են թոքի, շնչափողի, կոկորդի, ստամոքսաղիքային տրակտի, շագանակագեղձի ուռուցքներ, իսկ կանանց մոտ գերակշռում է կրծքագեղձի, արգանդի, արգանդի պարանոցի եւ ստամոքսաղիքային տրակտի ուռուցքը:
Ըստ Վարդանյանի՝ քաղցկեղի հայտնաբերման 60%-ի դեպքում առաջին անգամ հայտնաբերվում է հիվանդության արդեն 3-4-րդ փուլերում: Սա խնդիր է, որովհետեւ կանխարգելման մասին խոսք լինել չի կարող:
Հայ-ամերիկյան առողջության կենտրոնի գործադիր տնօրեն Խաչանուշ Հակոբյանն էլ նշեց, որ կրծքագեղձի քաղցկեղը համար մեկ հիվանդությունն է, որից կանայք ավելի շատ են մահանում։
«2016 թվականին կենտրոնում կատարվել է վահանաձեւ գեղձի շուրջ 2 հազար հետազոտություն, որի արդյունքում կատարվել է 600 բարակ ասեղային ասպիրացիա: Իրականցվել է գինեկոլոգիական մոտ 14 հազար հետազոտություն, 12 կնոջ մոտ ախտորոշվել է արգանդի պարանոցի քաղցկեղ, իսկ 15-ի մոտ արգանդի պարանոցի նախաքաղցկեղային վիճակ: Հայտնաբերվել է ձվարանի 4 քաղցկեղ»,- ասաց Հակոբյանը` նշելով, որ
2016 թվականին Հայ-ամերիկյան առողջության կենտրոնն ունեցել է 40 615 այցելու։
Նրա խոսքով` որքան ավելի շատ է ավելանում այցելուների թիվը, այնքան մեծանում է հավանականությունը, որ քաղցկեղը կբացահայտվի վաղ փուլում։
