ԵՐԵՎԱՆ, 3 փետրվարի — Sputnik, Արմենուհի Մխոյան. Ներդրումային ծրագրի առանցքում Գյումրու «Կումայրի» պատմաճարտարապետական կորիզի վերականգնումն է՝ երկու՝ Շիրազի ու Ռուսթավելի փողոցների վերակառուցման ծրագրի մեկնարկով: Մինչ Գյումրու պատմական կենտրոնի զարգացման ներդումային ծրագրի բուն մեկնարկը ստեղծվելու է ֆոնդ և կառավարիչ: Ֆոնդի ներդրումային փաթեթն այս պահին 10 միլիոն դոլար է՝ տարբեր աղբյուրներից: Ծրագիրն իրականացվելու է փուլային կարգով: Ծրագրի նախաձեռնող խմբի՝ «Հույս» Գյումրու շենացման հիմնադրամի պատասխանատուների վստահեցմամբ` Գյումրին գրավիչ է. այստեղ կարելի է ինչպես զբոսաշրջությունը զարգացնել, այնպես էլ՝ բիզնեսը: Ներդրողներին պետք միայն հետաքրքրել:
Ծրագրի հանդեպ ամենամեծ վստահությունը, նախաձեռնող խմբից զատ, անձամբ ՀՀ վարչապետինն է, ով Գյումրու «Տեխնոլոգիական կենտրոն»-ում, գործարարների ու ներդրողների հետ ունեցած հանդիպման ժամանակ, ուրախությամբ փաստեց, որ սա կարող է Գյումրու և Շիրակի մարզի զարգացման մեկնարկը համարել:
«Իրականում այսօր շատ բարձր տրամադրությամբ ենք եկել Գյումրի, ինչի համար շնորհակալ ենք այն գործարարներին, ովքեր ցանկություն հայտնեցին միանալու մեզ: Այս ծրագիրը, նախ և առաջ, Գյումրիում կլինի տրամադրություն փոխող ծրագիր: Կարծում եմ` հենց այսօր սրանով մենք մեկնարկ կտանք մեծ ներդրումային ծրագրի, որը բավական հետաքրքիր է»,- նշեց Կարեն Կարապետյանը` միայն ցավով հայտնելով, որ ինքը բիզնես ունենալու իրավունք չունի, այդ իսկ պատճառով դիմել է ընտանիքի անդամներին:
«Ցավոք սրտի, ես բիզնեսով զբաղվելու հնարավորություն չունեմ, բայց ես խնդրել եմ իմ ընտանիքի անդամներին, որպեսզի իրենք էլ ներդրում անեն»,-իր խոսքում նշեց ՀՀ վարչապետ Կարեն Կարապետյանը:
Ֆոնդի առաջին ներդրողը ՀՀ վարչապետն էր՝ Կարապետյան ընտանիքի անունից` 500 հազար դոլար:
ՀՀ վարչապետ Կարեն Կարապետյանն այսօր աշխատանքային այցով Շիրակի մարզում է։ Նրա հետ Հայաստանի հյուսիս են մեկնել 22 գործարար-ներդրողներ` Հայաստանից և արտերկրից։ Վարչապետի գլխավորած պատվիրակության Գյումրի այցի շրջանակներում պարզ դարձավ, որ Գյումրու պատմական հատվածի` «Կումայրի» պատմաճարտարապետական արգելոցի վերականգման ուղղությամբ կիրականացվեն ներդրումային ծրագրեր։
